झाडीमध्ये आढळला तरुणीचा मृतदेह

सारसोळे येथे पामबीचलगतच्या मार्गावर झाडीमध्ये अज्ञात तरुणीचा मृतदेह आढळला आहे. गळा चिरून हत्या केल्यानंतर मृतदेह जाळण्याचा प्रयत्न झाला आहे

नवी मुंबई : सारसोळे येथे पामबीचलगतच्या मार्गावर झाडीमध्ये अज्ञात तरुणीचा मृतदेह आढळला आहे. गळा चिरून हत्या केल्यानंतर मृतदेह जाळण्याचा प्रयत्न झाला आहे. रविवारी सकाळी अर्धवट जळालेल्या अवस्थेत हा मृतदेह आढळून आला.
सारसोळे जंक्शनपासून काही अंतरावर पामबीच मार्गालगत खाडीमध्ये जाण्याचा मार्ग आहे. पाऊलवाटेच्या याच मार्गावर रविवारी मृतदेह आढळून आला. दाट झाडीमध्ये हा मृतदेह टाकण्यात आला होता. रविवारी सकाळी याच मार्गावर असलेल्या मंदिराकडे चाललेल्या व्यक्तींना हा मृतदेह आढळला. अर्धवट जळालेल्या अवस्थेत तरुणीचा हा मृतदेह आहे. सुमारे २० ते २२ वर्षीय तरुणीचा हा मृतदेह आहे. गळा चिरून या तरुणीची हत्या करण्यात आलेली आहे. त्यानंतर पुरावा नष्ट करण्याच्या उद्देशाने हा मृतदेह जाळण्याचा प्रयत्न झाला. शनिवारी मध्यरात्री ते पहाटेच्या दरम्यान हा प्रकार झाला असावा अशी शंका पोलिसांनी व्यक्त केली आहे. पोलिसांनी घटनास्थळाची पाहणी करून हा मृतदेह ताब्यात घेतला आहे. याप्रकरणी नेरूळ पोलीस ठाण्यात हत्येचा गुन्हा दाखल करण्यात आला आहे. परंतु सदर तरुणीची ओळख पटलेली नसल्याचे सहाय्यक पोलीस आयुक्त विवेक मासाळ यांनी सांगितले.
मृतदेह शवविच्छेदनासाठी पाठवण्यात आला आहे. हा अहवाल आल्यानंतर तपासाला गती मिळेल, असा विश्वासही त्यांनी व्यक्त केला आहे. मात्र या घटनेने सारसोळे व नेरूळ परिसरात खळबळ उडालेली आहे. (प्रतिनिधी)