बफर तोडून लोकल फलाटाला धडकली

भार्इंदरपासून मरिन लाइन्सपर्यंत सुरळीत आलेली लोकल चर्चगेट स्थानकात येताच थेट बफर तोडून तब्बल १0 ते १५ फुटांपर्यंत फलाटावर चढली.

मुंबई : भार्इंदरपासून मरिन लाइन्सपर्यंत सुरळीत आलेली लोकल चर्चगेट स्थानकात येताच थेट बफर तोडून तब्बल १0 ते १५ फुटांपर्यंत फलाटावर चढली. रविवारी सकाळी घडलेल्या या अपघातात एका महिलेसह पाच प्रवासी जखमी झाले. विशेष म्हणजे सुटीचा दिवस असल्याने सुदैवाने फलाटावर आणि ट्रेनमध्ये फारशी गर्दी नव्हती अन्यथा मोठा अनर्थ घडला असता.
या अपघाताला कारणीभूत असलेल्या मोटरमनसह गार्ड आणि लोको इन्स्पेक्टरला पश्चिम रेल्वेने निलंबित केले आहे. ब्रेकमधील बिघाड अथवा मोटरमनच्या चुकीमुळे हा अपघात झाला असावा, असा अंदाज रेल्वे अधिकाऱ्यांकडून वर्तविण्यात येत आहे.
भार्इंदरहून चर्चगेटच्या दिशेने येणाऱ्या या १५ डबा जलद लोकलचे मोटरमन एल. एस. तिवारी होते. सकाळी ११.२0च्या सुमारास या लोकलने चर्चगेट स्थानकातील फलाट क्रमांक ३ वर प्रवेश केला. मात्र स्थानकात प्रवेश केल्यानंतर ती अचानक बफरवर (आपत्कालीन परिस्थितीत लोकल थांबवण्यासाठी असलेली व्यवस्था) आदळली आणि बफर तोडून या लोकलचा पहिला डबा (मोटरमनसह महिला डबा) तब्बल 15 फूट उंच उडून खाली आदळला. यात मोटरमनच्या केबिनचा अक्षरश: चक्काचूर झाला. आत अडकलेल्या मोटरमनला रेल्वे पोलीस तसेच टीसी आणि अन्य मोटरमनकडून बाहेर काढण्याचे प्रयत्न सुरु झाले. अथक प्रयत्नानंतर डब्यावर चढून जखमी मोटरमनला बाहेर काढून रुग्णालयात नेण्यात आले. 

अन्य डब्यांनाही जोरदार धक्का बसल्याने त्यातील प्रवाशांनी जीव वाचवण्यासाठी डब्यातून उडय़ा मारल्या. प्लॅटफॉर्म क्रमांक तीनचे काही प्रमाणात नुकसान झाले असून ओव्हरहेड वायरही तुटल्या. अपघातग्रस्त डबा पुन्हा रुळावर आणण्यासाठी रेल्वे कर्मचा:यांकडून रात्री उशिरार्पयत प्रयत्न सुरू होते.

या घटनेत किरकोळ मार लागलेल्या पाच प्रवाशांपैकी तीन जणांना स्थानकात प्राथमिक उपचार करून सोडण्यात आले. तर दोघांना जीटी रुग्णालयात नेण्यात आले. तेथे त्यांच्यावर उपचार करून त्यांना घरी सोडण्यात आल्याचे पश्चिम रेल्वेकडून सांगण्यात आले. 

हा अपघात नेमका कसा झाला याचा शोध रेल्वेकडून घेण्यात येत आहे. ब्रेक फेल, अतिवेग अथवा मोटरमनच्या चुकीने हा अपघात घडला असावा, असे वेगवेगळे अंदाज वर्तविण्यात येत आहेत. मात्र चौकशी पूर्ण झाल्यावरच खरे कारण स्पष्ट होईल, असे रेल्वे प्रशासनाकडून सांगण्यात आले.

मोटरमनसह तिघे निलंबित
या घटनेत मोटरमनसह गार्ड आणि लोको इन्स्पेक्टरला निलंबित केल्याचे पश्चिम रेल्वेचे महाव्यवस्थापक सुनीलकुमार सूद यांनी सांगितले. एक चौकशी समिती नेमली असून पाच दिवसांत त्याचा अहवाल येईल, असे सांगण्यात आले.