अंधेरीत मांजरीला जिवंत जाळले; आरोपीचा शोध सुरू

अंधेरीत एका मांजरीला बांधून जिवंत जाळल्याची धक्कादायक घटना मंगळवारी उघडकीस आली आहे. या घटनेमुळे सर्व स्तरांतून संताप व्यक्त करण्यात येत आहे.

मुंबई : अंधेरीत एका मांजरीला बांधून जिवंत जाळल्याची धक्कादायक घटना मंगळवारी उघडकीस आली आहे. या घटनेमुळे सर्व स्तरांतून संताप व्यक्त करण्यात येत आहे. ओशिवरा येथील गावदेवी परिसरात असलेल्या इमारतीच्या मागे एक मांजर भाजलेल्या अवस्थेत सापडली होती. त्यामुळे या परिसरात खळबळ उडाली होती. त्या मांजरीला बरेच दिवस उपाशी ठेवण्यात आले. त्यानंतर तिला बांधून जिवंत जाळण्यात आल्याची चर्चा स्थानिकांमध्ये होती. याबाबत एका प्राणिप्रेमी संघटनेला समजताच त्यांनी ‘त्या’ मृत मांजरीला परळ येथील रुग्णालयात शवविच्छेदनासाठी पाठवले. तिचा मृत्यू नेमका कसा झाला, याची चौकशी संघटनेचे अधिकारी करत आहेत. या प्रकरणी स्थानिकांनी ओशिवरा पोलिसांना कळवले. त्यानंतर प्राणिप्रेमी संघटनेने त्या ठिकाणी धाव घेतली. हे काम एखाद्या माथेफिरूचे असल्याचे त्यांचे म्हणणे आहे.
याप्रकरणी ओशिवरा पोलीस तपास करत आहेत. हा प्रकार पाहणारा कोणी प्रत्यक्षदर्शी आहे का, याचा शोध पोलीस घेत आहेत. मांजर सापडली त्या ठिकाणी सीसीटीव्ही कॅमेरे नाहीत. त्यामुळे मारेकऱ्याची ओळख पटविण्यात अडथळे निर्माण होत आहेत. काही दिवसांपूर्वी मालवणीमध्येदेखील एका श्वानावर अत्याचार करण्यात आला होता,
त्यात त्याचा मृत्यू झाला होता.