ठाणे, दि. 12- भिवंडीतील माणकोलीजवळ भीषण अपघात झाल्याची माहिती मिळते आहे. टीएमटीची बस आणि एका स्विफ्ट डिझायर गाडी;e भीषण अपघात झाला आहे. या अपघातात चार जणांचा मृत्यू झाल्याचं समजतं आहे. या अपघातानंतर परिसरात वाहतूक खोळंबली असून वाहतूक पूर्ववत करण्यासाठी पोलिसांचे प्रयत्न सुरू आहेत. या अपघातात दोन जण जखमी झाल्याची माहिती मिळते आहे.
ठाणे -नाशिक महामार्गावर आज सकाळी हा अपघात झाला. या मार्गावरून जाणाऱ्या कारचालकाचं नियंत्रण सुटून कार दुभाजकावरून विरूध्द दिशेला जाणाऱ्या टीएमटी बसला धडकली. त्यामुळे झालेल्या अपघातात चारजणांचा जागीच मृत्यू झाला. तर दोन जण गंभीर जखमी झाल्याचं समजतं आहे. जखमी झालेल्या दोन जणांना मुंबईतील जे.जे.रूग्णालयात दाखल केले असून त्यांची प्रकृती चिंताजनक आहे. घटनेतील मृताची व जखमींची ओळख पटली नसून पोलिसांकडून तपास केला जातो आहे.
या अपघातामुळे वाहतूकीचा खोळंबा झाला आहे. नाशिक महामार्गावर माणकोलीजवळ वाहतूक कोंडी झाली आहे. ठाण्यात विवियाना मॉलपर्यंत वाहनांच्या रांगा लागल्या आहेत तर भिवंडी बायपासवर कल्याण फाट्यावर वाहतुकीची कोंडी झाल्याचं समजतं आहे.