मुंबई : मराठी विज्ञान परिषदेतर्फे लोकोपयोगी संशोधन करणाऱ्या तसेच ४० वर्षाखालील अभियंत्याला मोक्षगुंडम विश्वेश्वरय्या पुरस्कार (रुपये दहा हजार व प्रमाणपत्र) २०१८ पासून देण्यात येतो. यंदाचा हा पुरस्कार डॉ. प्रियंका खोले यांना जाहीर झाला असून, त्या पहिल्या महिला मानकरी आहेत.
कृषिअभियंता असलेल्या डॉ. प्रियंका यांनी प्रत्यक्ष शेता-शेतावर जाऊन अडचणींचे निरीक्षण केले. जमिनीखाली येणा-या (भुईमूगाच्या शेंगा, लसूण इत्यादी) पिकांना बाहेर काढण्यासाठी लागणाऱ्या मनुष्यबळाची अडचण लक्षात घेऊन, त्यांनी प्रचलित उपकरणांमध्ये केलेल्या सुधारणांमुळे शेतक-यांचा अडचणी दूर झाल्या असून याविषयी डॉ. प्रियंका यांचे काही शोध-निबंधही प्रसिद्ध झाले आहेत. यावर्षी या पुरस्कारासाठी नांदेड, धुळे, कोल्हापूर, मुंबई या ठिकाणाहून प्रवेशिका आल्या होत्या.