पदवी अभ्यासक्रमांच्या प्रवेशासाठीही सीईटी?

मुंबई: राज्यातील बारावीच्या परीक्षा रद्द झाल्यानंतर शिक्षण विभाग व शिक्षण मंडळ आता अंतर्गत मूल्यमापनासाठी विद्यार्थ्यांच्या नववी ते अकरावी या वर्षांच्या गुणांचा, शैक्षणिक कामगिरीचा आधार घेण्याची शक्यता आहे; मात्र मागील वर्षी कोरोनाच्या कारणास्तव अकरावीच्या वर्षाची न झालेली अंतिम परीक्षा तसेच अकरावीचा अभ्यासक्रम, परीक्षा गंभीरपणे न घेणे या विद्यार्थ्यांच्या सवयीचा, दृष्टिकोनाचा त्याच्या यंदाच्या बारावीच्या गुणांकनावर परिणाम होण्याची शक्यताही अभ्यासकांकडून व्यक्त होत आहे. त्यामुळे एकूण बारावीची परीक्षा रद्द झाली असली तरी अंतर्गत मूल्यमापनाची पद्धती आणि पारंपरिक, व्यावसायिक पदवी अभ्यासक्रमांना प्रवेशांवर होणारा त्याचा परिणाम यांबद्दल पालक, शिक्षणतज्ज्ञ, विद्यार्थ्यांमधून मतमतांतरे व्यक्त होत आहेत.

बारावीच्या परीक्षा रद्द झाल्या म्हणजे विद्यार्थ्यांचे सर्व प्रश्न सुटले, असे सध्यातरी म्हणता येणार नाही. तेव्हा महाविद्यालयीन प्रवेश कसे होणार? विद्यापीठ यासंदर्भात काय निर्णय घेऊ शकतात? केवळ अंतर्गत गुणांच्या आधारे हे प्रवेश होऊ शकतात का? की महाविद्यालयीन प्रवेशांसाठी विद्यार्थ्यांना स्वतंत्र सीईटी द्यावी लागणार? असे अनेक प्रश्न अनुत्तरित आहेत. व्यावसायिक अभ्यासक्रमांना प्रवेश घेताना सीईटी किंवा इतर प्रवेश परीक्षा द्याव्या लागणार असल्या तरी बारावीतील पीसीएम-पीसीबी यातील किमान ५० टक्के गुणांची आवश्यकता अंतर्गत मूल्यमापनाद्वारे कशी साधणार, हा प्रश्न अनेक विद्यार्थी पालकांपुढे आहे.

दरम्यान, अकरावी प्रवेशासाठी ज्याप्रमाणे सीईटी आयोजित करण्यात येणार आहे, त्याचप्रमाणे ती पदवी प्रवेशांसाठी घेता येऊ शकते का, याची चाचपणीही शिक्षण विभागाकडून करण्यात येऊ शकते, अशी शक्यता असल्याचे शिक्षण मंडळातील काही सूत्रांनी सांगितले आहे. पदवी प्रवेश गुणवत्तेच्या आधारावर न झाल्यास महाविद्यालयीन पदवी प्रवेशांत स्पर्धा प्रचंड वाढून गोंधळ होऊन विद्यार्थ्यांना हव्या त्या महाविद्यालयात प्रवेश मिळणे अधिक आव्हानात्मक ठरणार असल्याच्या प्रतिक्रिया देत आहेत. त्यामुळे उच्च व तंत्र शिक्षण विभाग आणि विद्यापीठ कुलगुरू, शिक्षण विभाग यांनी मिळून पदवी प्रवेशप्रक्रियेचा हा तिढा सोडवणे संयुक्तिक ठरणार असून मूल्यांकनाचा फॉर्म्युला आणि प्रवेशाच्या प्रक्रियेकडे सगळ्यांचे लक्ष लागून राहिले आहे.