मुंबई : मुंबई आणि अहमदाबादला जोडणारी बुलेट ट्रेन किनारपटटी भागातून जाणार असून, या किनारपटटी भागातील वा-याचा बुलेट ट्रेनच्या वेगासह कामकाजावर परिणाम होण्याची शक्यता आहे. यावर खबरदारीची उपाय योजना म्हणून महाराष्ट्र आणि गुजरातमध्ये १४ ठिकाणी अ‍ॅनिमोमीटर बसविण्यात येणार असून, त्याद्वारे वा-याचा वेग मोजता येईल आणि बुलेट ट्रेनचा वेग नियंत्रणात ठेवता येईल.
मुंबई ते अहमदाबादपर्यंतचा बुलेट ट्रेनचा मार्ग हा जमिनीपासून ५ ते १५ मीटर उंचीवरआहे. या उंचीवरून बुलेट ट्रेन धावताना तिला वा-याचा वेगाचाही सामना करावा लागणार आहे. विशेषत: समुद्र किनारपटटीवरून वेगाने वारे वाहतात. अनेक चक्रीवादळाचीही शक्यता असते. अशा घटनांत बुलेट ट्रेन किती वेगाने चालवायची किंवा थांबावायची ? याचा निर्णय घेण्यासाठी अ‍ॅनिमोमीटर मदत करणार आहेत.
बुलेट ट्रेन धावणा-या व्हायाडक्टवर १४ ठिकाणी ॲनिमोमीटर बसवले जातील. ही उपकरणे वाऱ्याच्या गतीचे निरीक्षण करतील. नदीवरील पूल आणि वादळी वारे यावर लक्ष केंद्रित करतील.
ट्रेनचा वेग -
जर वा-याचा वेग २० मीटर प्रति सेकंद ते ३५ मीटर प्रति सेकंद पर्यंत असेल तर ट्रेनचा वेग त्यानुसार ठरविला जाईल.
वा-याचा वेग ३५ मीटर प्रति सेकंदपेक्षा जास्त असल्यास खबरदारीचा उपाय म्हणून ट्रेन थांबविली जाईल. अशा परिस्थितीत, वा-याचा वेग तुलनेने कमी असलेल्या सुरक्षित ठिकाणी, जसे की बोगदे किंवा डोंगराच्या दुतर्फा गाड्या थांबवल्या जातील.
ऑपरेशन कंट्रोल सेंटर विविध ठिकाणी बसविण्यात आलेल्या ॲनिमोमीटरद्वारे वा-याच्या वेगावर लक्ष ठेवेल.
ॲनिमोमीटरद्वारे ही आपत्ती प्रतिबंधक प्रणाली आहे. जी ०-७० मीटर प्रति सेकंदच्या मर्यादेत वास्तविक वेळेच्या वा-याच्या वेगाची माहिती देण्यासाठी तयार करण्यात आली आहे.
स्थान / राज्य :देसई खाडी / महाराष्ट्र
उल्हास नदी / महाराष्ट्र
बंगाला पाडा / महाराष्ट्र
वैतरणा नदी / महाराष्ट्र
डहाणू / महाराष्ट्र
दमणगंगा नदी / गुजरात
पार नदी / गुजरात
नवसारी / गुजरात
तापी नदी / गुजरात
नर्मदा नदी / गुजरात
भरुच-वडोदराच्या मध्यभागी / गुजरात
मही नदी / गुजरात
बरेजा / गुजरात
साबरमती नदी / गुजरात