CoronaVirus In Maharashtra: चिंताजनक! राज्यात दिवसभरात काेराेनाचे ६,९७१ नवे रुग्ण; चार हजार उपचाराधीन रुग्णांचीही वाढ

दिवसभरात काेराेनाचे ६,९७१ नवे रुग्ण, ३५ मृत्यू

मुंबई : राज्यात मागील काही दिवसांपासून दैनंदिन रुग्णांमध्ये भर पडत आहे. त्यामुळे राज्य शासनासह स्थानिक प्रशासनही संसर्ग नियंत्रणासाठी प्रयत्न करत आहेत. राज्यात रविवारी उपचाराधीन रुग्णांच्या संख्येतही वाढ झाल्याचे दिसून आले आहे. राज्यात शनिवारी ४८ हजार ४३९ रुग्ण उपचाराधीन असल्याची नोंद होती, यात चार हजार रुग्णांची वाढ होऊन रविवारी ५२ हजार ९५६ रुग्णांवर उपचार सुरू असल्याची माहिती आरोग्य विभागाने दिली.

राज्यात रविवारी ६,९७१ रुग्ण आणि ३५ बाधितांचा मृत्यू झाला. त्यामुळे बाधितांची एकूण संख्या २१ लाख ८८४ पोहोचली असून बळींचा आकडा ५१,७८८ झाला. दिवसभरात २,४१७ रुग्ण बरे झाले. तर  एकूण १९ लाख ९४ हजार ९४७ रुग्ण कोरोनामुक्त झाले. रुग्ण बरे होण्याचे प्रमाण ९४.९६ टक्क्यांवर पोहोचले आहे.

राज्याचा मृत्युदर २.४७ टक्के आहे. आजपर्यंत तपासण्यात आलेल्या १ कोटी ५७ लाख २० हजार २५९ प्रयोगशाळा नमुन्यांपैकी १३.३६ टक्के नमुने पॉझिटिव्ह आले आहेत. सध्या राज्यात २ लाख ४२ हजार ५३६ व्यक्ती घरगुती अलगीकरणात असून १ हजार ७३२ व्यक्ती संस्थात्मक विलगीकरणात आहेत.

सक्रिय रुग्णांत झालेली वाढ
२१ फेब्रुवारी - ५२ हजार ९५६
 २० फेब्रुवारी - ४८ हजार ४३९
१९ फेब्रुवारी - ४४ हजार ७६५
 १८ फेब्रुवारी - ४० हजार ८५८
 १७ फेब्रुवारी - ३८ हजार १३