Coronavirus Mumbai 144 : कोरोनाच्या वाढत्या रुग्णसंख्येनं टेन्शन वाढवलं; मुंबईत ७ जानेवारीपर्यंत जमावबंदी

कोरोनाच्या वाढत्या रुग्णसंख्येच्या पार्श्वभूमीवर मुंबईत जमावबंदी लागू. पाचपेक्षा अधिक लोकांना एकत्र येण्यास मनाई

Coronavirus Omicron Variant Patients numbers increased : काही दिवसांपूर्वी कोरोनाच्या रुग्णसंख्येचा आलेख खाली येत होता. परंतु आता पुन्हा एकदा कोरोनाबाधितांच्या संख्येत मोठी वाढ होत असल्याचं दिसून येत आहे. याशिवाय कोरोनाच्या ओमायक्रॉन (Omicron Variant) व्हेरिअंटचेही रुग्ण वाढताना दिसत आहेत. बुधवारी मुंबईत २ हजार ५१० कोरोनाबाधितांची नोंद झाली. त्यानंतर आता गुरुवारी मुंबई पोलिसांनी शहरात कलम १४४ म्हणजेच जमावबंदी लागू केली आहे.

मुंबईमध्ये जमावबंदी लागू केल्यानंतर आता जमावबंदी आदेशानुसार सार्वजनिक ठिकाणी पाच पेक्षा अधिक लोकांना एकत्र जमता येणार नाही. नववर्षाच्या पार्श्वभूमीवर मोकळ्या जागांमध्ये किंवा बंदिस्त जागांमध्ये पार्टीचं अथवा कोणत्याही उपक्रमाच्या आयोजनास बंदी घालण्यात आली आहे. ३० डिसेंबर ते ७ डिसेंबर या कालावधील, रेस्तराँ, हॉटेल्स, ओपन स्पेस किंवा बंदिस्त जागांमध्ये नववर्षाच्या स्वागतानिमित्त कोणत्याही कार्यक्रमाचं किंवा पार्टींचं आयोजन करता येणार नसल्याचं पोलिसांनी म्हटलंय.

Maharashtra | Section 144 imposed in Mumbai starting from today till 7th January 2022, in view of rising Covid cases

Police prohibit New Year's celebrations, parties in any closed or open space incl restaurants, hotels, bars, pubs, resorts & clubs from Dec 30 Dec till Jan 7.

— ANI (@ANI) December 30, 2021

कोविड केंद्रे सुरू करण्याची तयारी
कोविड रुग्णांची संख्या दोनशेवरुन आता दोन हजारांवर पोहोचल्याने महापालिकेने पाच जम्बो कोविड केंद्र सुरु करण्याची तयारी केली आहे. या केंद्रांची देखभाल व वैद्यकीय सेवा पुरविण्यासाठी ठेकेदार नियुक्त करण्यात येणार आहे. यासाठी महापालिका संबंधित वैद्यकीय संस्थेला १०५ कोटी रुपये देणार आहे. पुढील तीन महिन्यांसाठी अथवा जोपर्यंत कोविडचा प्रादुर्भाव कमी होत नाही, तोपर्यंत या केंद्रांची जबाबदारी संबंधित खासगी वैद्यकीय संस्थेकडे असणार आहे. 

कोरोनाच्या पहिल्या लाटेवेळी मुंबईत खाटांची मोठ्या प्रमाणात कमतरता जाणवल्याने महापालिकेने जम्बो कोविड केंद्र सुरु केली. एमएमआरडीए आणि सिडकोमार्फत उभारण्यात आलेल्या जम्बो कोविड केंद्रांची देखभाल खासगी संस्थांकडे सोपविण्यात आली आहे. मात्र रुग्ण संख्येत घट झाल्यानंतर यापैकी पाच केंद्रे बंद करण्यात आली. परंतु, मागील आठड्यापासून रुग्ण संख्येत पुन्हा वाढ होताना दिसून येत आहे. त्यामुळे बंद जम्बो कोविड केंद्रे देखील सुरु करण्यात येणार आहेत.