CoronaVirus News in Mumbai: टोळक्यांना हटकल्याच्या रागातून पोलिसांवर पुन्हा हल्ला

याप्रकरणी पोलीस हवालदार सुहास देसाई यांच्या फिर्यादीवरून शिवाजीनगर पोलिसांनी गुन्हा दाखल केला आहे.

मुंबई : रस्त्यावर गर्दी करत गप्पा मारत बसलेल्या टोळक्यांना हटकल्याच्या रागात शिवाजीनगर पोलिसांना शिवीगाळ करत पोलिसांवर दगडफेक करण्यात आल्याची घटना बुधवारी घडली आहे. आतापर्यंतची ही तिसरी घटना आहे. याप्रकरणी पोलीस हवालदार सुहास देसाई यांच्या फिर्यादीवरून शिवाजीनगर पोलिसांनी गुन्हा दाखल केला आहे. बुधवारी सायंकाळी साडेसहा वाजता शिवाजीनगर पोलीस बैगनवाडी परिसरात गस्त घालत असताना, येथील रस्ता क्रमांक १४ येथे काही मंडळी गप्पा मारत असल्याचे पोलिसांनी पाहिले. त्यांना घरी जाण्यास सांगताच काही जण माघारी फिरले. तर त्यातील एकाने ‘ये किसी के बाप का रस्ता नहीं है. पोलीस को अधिकार नही हैं हमे यहा से हटाने का. तुम लोक निकलो यहा से, असे बोलून शिवीगाळ करण्यास सुरुवात केली. त्याला पकडण्याचा प्रयत्न करताच त्यांच्यावर दगडफेक करण्यात आली. पोलिसांनी नागरिकांना आवाहन करत संबंधित तरुणाला पकडण्यास सांगताच, नागरिकांनी त्याला पकडून चांगलाच चोप दिला़ पोलिसांनी संबंधित मोहम्मद कलीम शहा (४१) याला ताब्यात घेत अटक केली आहे. शहा हा रिक्षाचालक असून येथीलच रहिवासी आहे.महिनाभरात येथील पोलिसांवर हा तिसरा हल्ला आहे. यापूर्वी गोवंडीतील शिवाजीनगर झोपडपट्टीत फेरीवाल्यांभोवती जमलेली गर्दी पांगवण्याचा प्रयत्न करत असताना चिडलेल्या रहिवाशांनी हल्ला केला़