एचडीआयएलच्या २३३ कोटी शेअर्सवर ईडीचा कब्जा

लोकमत न्यूज नेटवर्क

मुंबई : पीएमसी बँकेच्या शेकडो कोटींच्या कर्ज घोटाळ्याप्रकरणी सक्तवसुली संचालनालयाने (ईडी) हाऊसिंग डेव्हलपमेंट इन्फ्रास्ट्रक्चर लिमिटेड (एचडीआयएल) समूहाच्या कंपन्यांच्या २३३ कोटी शेअर्सवर गुरुवारी जप्ती आणली. या समभागाच्या जोरावर एचडीआयएलकडे विकासक आर्यमन डेव्हलपर्स प्रायव्हेट लिमिटेडच्या मुंबईतील घाटकोपरमध्ये ९०,२५० चौरस फूट एफएसआय (फ्लोअर स्पेस इंडेक्स) च्या अंडर-कन्स्ट्रक्शन फ्लॅटचे वाटप करण्याचे अधिकार होते. त्यावर आता ईडीचे नियंत्रण राहणार असल्याचे सूत्रांकडून सांगण्यात आले.

बिल्डरने हे प्रकल्प पूर्ण झाल्यावर कोणत्याही तृतीय पक्षाचे अधिकार विकू नये, हस्तांतरित करू नये, वेगळे करू नये किंवा निर्माण करू नये याची हमी दिल्याचे त्यांनी स्पष्ट केले.

ईडीने ऑक्टोबर २०१९ मध्ये पंजाब आणि महाराष्ट्र सहकारी (पीएमसी) बँकेत शेकडो कोटींचे कर्ज घेऊन फसवणूक केल्याप्रकरणी एचडीआयएलचे प्रवर्तक राकेश कुमार वाधवान, त्याचा मुलगा सारंग वाधवान, त्याचे माजी अध्यक्ष वर्याम सिंह आणि माजी व्यवस्थापकीय संचालक जॉय थॉमस यांच्याविरोधात मनी लाँड्रिंगचा गुन्हा दाखल करून अटक केली होती. सध्या सर्वजण न्यायालयीन कोठडीत आहेत. ईडीने केलेल्या तपासानुसार समरसेट कन्स्ट्रक्शन प्रायव्हेट लिमिटेड, सर्वेल कन्स्ट्रक्शन प्रायव्हेट लिमिटेड, नीलमणी जमीन विकास प्रायव्हेट लिमिटेड, एमराल्ड रियल्टर्स प्रायव्हेट लिमिटेड, आवास डेव्हलपर्स आणि कन्स्ट्रक्शन प्रायव्हेट लिमिटेड, पृथ्वी रियल्टर्स आणि हॉटेल्स प्रायव्हेट लिमिटेड आणि सत्यम रियाल्टर्स प्रायव्हेटचे प्रवर्तक आणि अधिकारी यांचा समावेश आहे.

ईडीने पीएमसी बँकेला ४,३५५ कोटी रुपयांचे चुकीचे नुकसान केल्याबद्दल आणि संबंधित नफ्यावर मुंबई पोलिसांच्या आर्थिक गुन्हे शाखेने नोंदवलेल्या एफआयआरच्या आधारे मनी लाँड्रिंग प्रतिबंधक कायद्याच्या (पीएमएलए) अंतर्गत तपास सुरू केला होता.

‘एचडीआयएलच्या बँक खात्यांची कार्यपद्धती आणि पद्धत स्पष्टपणे एचडीआयएलच्या प्रवर्तकांसोबत पीएमसी बँकेच्या अधिकाऱ्यांशी संगनमत दर्शवते. पीएमसीच्या अधिकाऱ्यांकडून गैरवर्तन झाले, कारण त्यांनी एचडीआयएलच्या प्रवर्तकांना असामान्य क्रेडिट सुविधा वाढवून देण्यासाठी सर्व प्रचलित प्रक्रियेकडे दुर्लक्ष केले.

राकेश वाधवान व एचडीआयएलच्या अन्य प्रवर्तकांनी पीएमसी बँकेकडून घेतलेल्या निधीचा वापर फसव्या पद्धतीने विविध प्रकल्पांमध्ये केला आहे. २०११-१२ या वर्षात एचडीआयएलकडून मुंबईच्या मुकेश दोशी यांच्या समूह कंपन्यांना २३३ कोटी रुपये हस्तांतरित करण्यात आले.