महिला सक्षमीकरणासाठी त्यांचे हक्क, प्रतिनिधित्व आणि विकासाची संसधाने उपलब्ध होणे गरजेचे - नीलम गोऱ्हे

मुंबईतील वर्ल्ड ट्रेड सेंटर येथे टीसर संस्थेच्यावतीने आयोजित 'डीजीटॉल' या चर्चासत्रात त्या बोलत होत्या.

मुंबई : महिला सक्षमीकरणाची संकल्पना व्यापकप्रमाणात कृतीशील होण्यासाठी महिलांचे हक्क, त्यांचे प्रतिनिधित्व आणि प्रगतीसाठीची संसधाने त्यांना सहजतेने उपलब्ध होणे आवश्यक आहे, असे प्रतिपादन विधानपरिषदेच्या उपसभापती डॉ. नीलम गोऱ्हे यांनी केले. मुंबईतील वर्ल्ड ट्रेड सेंटर येथे टीसर संस्थेच्यावतीने आयोजित 'डीजीटॉल' या चर्चासत्रात त्या बोलत होत्या.

यावेळी नीलम गो-हे म्हणाल्या की, आजच्या तंत्रज्ञानाच्या युगात डिजीटल माध्यमातून महिलांना त्यांच्या क्षमता सिद्ध करणे शक्य होणार असेल तरी  त्यासाठी आवश्यक असणारी माध्यमे स्मार्टफोन, लॅपटॉप, इतर पूरक आधुनिक साधने, तंत्रज्ञानाचे प्रशिक्षण या बाबी सहजतेने मिळत नाही. त्यादृष्टीने महिलांना व्यापक संधी देण्याची मानसिकता समाजात वाढीस लागणे आवश्यक आहे. 1 दशलक्षाहून अधिक महिला निर्णय प्रक्रियेत आहेत, ते लक्षात घेता महिलांच्या हक्क, प्रतिनिधित्व आणि विकासाच्या संसाधनाच्या उपलब्धतेसाठी आणखी भरीव प्रयत्न करणे आवश्यक आहे.

महाराष्ट्र राज्यात महिला आर्थिक विकासासाठी अनेक योजना यशस्वीरित्या राबविल्या गेलेल्या आहेत. त्यासोबतच माविम, उमेद,स्त्री आधार केंद्र या सारख्या शासकीय आणि स्वयंसेवी संस्थाच्या माध्यमातून मोठ्या प्रमाणात महिलांच्या सामाजिक,आर्थिक, शैक्षणिक सबलीकरणाला केंद्रीभूत ठेऊन उपक्रम राबवले जात आहेत. त्याचप्रमाणे लवकरच राज्य शासनाचे चौथे महिला धोरण जाहीर होणार आहे. मात्र  स्त्रीवादी परराष्ट्र धोरण सोपे होण्यासाठी त्या मार्गावर फारशी प्रगती झाली आहे, असे वाटत नाही, असे नीलम गोऱ्हे म्हणाल्या.
  
याचबरोबर, शाश्वत विकास आणि हवामान बदल या दोन महत्वाच्या विषयांवरही जागतिक स्तरावर व्यापक काम करण्याची गरज असून या दोन्ही क्षेत्रात परस्पर सहकार्याने विविध उपक्रम राबवता येतील. त्याचप्रमाणे जगभरातील विविध यशकथांची देवाण-घेवाण या माध्यमातून केल्यास ती एकमेकांना निश्चितच दिशादर्शक ठरेल, असेही नीलम गोऱ्हे यांनी सांगितले.

यावेळी सर्व मान्यवरांना हस्तकला कारागीरांनी बांबूपासून तयार केलेल्या भारतीय ध्वजाच्या विशेष प्रतिमा भेट देण्यात आल्या. तसेच, यावेळी व्यासपीठावर टिसर संस्थेच्या डॉ.मेधा फणसळकर, डॉ. अनिता तोष्णीवाल, रंग दे संस्थेचे रामकृष्ण एन. के., प्रत्युष पांडा,  मेक्सिकोचे कौन्सुलेट जनरल अडॉल्फ ग्रेसिया एत्राडा, हेमंत गुप्ता, हनीशा वासवाणी, डॉ. अमीना चरणीया यांच्यासह इतर अनेक संस्थाचे मान्यवर, महाराष्ट्राच्या ग्रामीण भागातील हस्तकला कारागीर आणि सामाजिक कार्यकर्ते उपस्थित होते.