लोकमत न्यूज नेटवर्क
मुंबई : अजय देवगणने शेतकऱ्यांना पाठिंबा द्यावा, या मागणीसाठी त्याची कार शेतकरी तरुणाने अडवल्यानंतर या प्रकरणावरून अजयचे फॅन्स सोशल मीडियावर आक्रमक झाले. अजयसंदर्भातील नाराजगीच्या कमेंट्स आणि पोस्ट टाकत त्यांनी अजयवर हल्लाबोल केला. अजयसोबत जो प्रकार घडला तशीच काहीशी कथा तो मुख्य भूमिकेत असलेल्या ‘हल्लाबोल’ या चित्रपटाची आहे. यात एका छाेट्या शहरातील मुलगा अश्फाक यशाच्या शिखरावर चढत मोठा सुपरस्टार होतो. मात्र त्याच्या डोळ्यादेखत झालेल्या एका गुन्ह्याबाबत सिस्टीमच्या भीतीने साक्ष देण्यास पाठ फिरवतो. यंत्रणेविराेधात लढण्याची त्याची हिंमत नसते. त्यावेळी पथनाट्याद्वारे समाजातील विविध विषयांबाबत भाष्य करत जनजागृती करणारे आणि त्याच्या गुरूच्या भूमिकेत दाखविलेले सिद्धू (पंकज कपूर) त्याला येऊन भेटतात आणि त्याची कानउघाडणी करतात. अजयच्या गोरेगावमधील व्हायरल झालेल्या व्हिडीओमध्येही अशाच प्रकारे जाब विचारताना सिंग दिसत आहे. त्या चित्रपटात म्हणजे रील लाईफ आणि शेतकरी आंदोलनाबाबत म्हणजे रियल लाईफमध्ये अजयने साधलेली ‘चुप्पी’ अनेकांच्या नाराजीचे कारण ठरत आहे. अजयच्या अनेक फॅन्सने या चित्रपटाचा उल्लेख कमेंट करताना करून अजयवर हल्लाेबाेल केल्याचे दिसून येत आहे.