पुरामुळे दुसऱ्या दिवशीही कोकण रेल्वे विस्कळीत

लोकमत न्यूज नेटवर्क

मुंबई : रत्नागिरी जिल्ह्यात ठिकठिकाणी उद्भवलेली पूरपरिस्थिती, तसेच कोकण रेल्वे मार्गावर कोसळलेल्या दरडींमुळे कोकण रेल्वे सलग दुसऱ्या दिवशीही विस्कळीत झाली. त्यामुळे या मार्गावरील अनेक ट्रेन रद्द करण्यात आल्या, तर काही दुसऱ्या मार्गावरून वळविण्यात आल्या. खबरदारीचा उपाय म्हणून काही ट्रेन शॉर्ट टर्मिनेटदेखील करण्यात आल्या.

कोकण रेल्वेमार्गावर कोकण कन्या, दादर- सावंतवाडी, मडगाव- हापा, वास्को- द- गामा -हजरत निजामुद्दीन, यशवंतपूर - वास्को द गामा आणि वास्को- द- गामा - तिरुपती - हैदराबाद, मंगळुरू, पुणे, सोलापूर व नांदेड येथे जाणाऱ्या गाड्या रद्द करण्यात आल्या, तर चंदीगड - कोचुवेली, हिसार - कोइंबतूर, हजरत निजामुद्दीन - एर्नाकुलम आणि एलटीटी तिरुवनंतपुरम या गाड्या दुसऱ्या मार्गावरून वळविण्यात आल्या.