दोन अपघातांत बेस्ट बससह चार वाहनांचे नुकसान

सोमवारी रात्री मुंबईत झालेल्या रिमझिम पावसामुळे मानखुर्द जकात नाका येथे दोन अपघात झाले. या अपघातांत बेस्ट बससह

लोकमत न्यूज नेटवर्क
मुंबई : सोमवारी रात्री मुंबईत झालेल्या रिमझिम पावसामुळे मानखुर्द जकात नाका येथे दोन अपघात झाले. या अपघातांत बेस्ट बससह चार वाहनांचे नुकसान झाले. याबाबत मानखुर्द पोलिसांनी घटनेची नोंद करत तपास सुरू केला आहे.
गेल्या काही दिवसांपासून मुंबईसह राज्यात अवकाळी पावसाला सुरुवात झाली आहे. त्यानुसार सोमवारी रात्री मुंबईच्या अनेक भागांत पावसाने हजेरी लावली होती. या पावसामुळे रस्ते निसरडे होऊन वाहने घसरत होती. मानखुर्द जकात नाका येथेदेखील वाशीच्या दिशेने जाणाऱ्या मार्गावर दोन अपघात झाले. पहिला अपघात खाजगी बस व बेस्ट बसमध्ये झाला. वाहतूक पोलिसांनी ही दोन्ही वाहने हटवल्यानंतर काही वेळातच एका भरधाव डम्परला खासगी बसने धडक दिली. या अपघातात खासगी बसचे नुकसान झाले आहे. ही दोन्ही वाहने रस्त्याच्या मधोमध उभी राहिल्याने वाशीकडे जाणारा मार्ग बराच वेळ ठप्प होता. या अपघातामुळे रस्त्यावर मोठ्या प्रमाणात तेलगळती झाली होती. त्यामुळे आणखी अपघात होण्याची भीती असल्याने वाहतूक पोलिसांनी ही वाहने हटवून तेलगळती झालेल्या मार्गावर अग्निशमन दलाच्या मदतीने माती टाकली. तोपर्यंत वाहनांच्या मोठ्या रांगा लागल्याने वाहनचालकांना मोठा मनस्ताप सहन करावा लागला.