केळव्यातील कुटुंबावर काळाचा चौथा घाला

येथील मांगेलआळी परिसरातील रमेश पाटील यांच्या कुटुंबावर काळाने गुरुवारी चौथा घाला घातला. कैलास यांचा रेल्वेखाली मृत्यू झाला.

आशिष पाटील / केळवे
येथील मांगेलआळी परिसरातील रमेश पाटील यांच्या कुटुंबावर काळाने गुरुवारी चौथा घाला घातला. कैलास यांचा रेल्वेखाली मृत्यू झाला. गेल्या काही महिन्यात अपघातामध्ये या कुटुंबातील चौथ्या व्यक्तीचा मृत्यू झाला आहे.
गुरुवारी संध्याकाळी कैलास बोईसरला पॅसेंजर समजून चुकून सौराष्ट्र जनता एक्सप्रेस या फास्ट गाडीत बसला ही गाडी केळवे रोड येथे थांबेल असे कैलासला अपेक्षित होते. मात्र भरधाव जाणाऱ्या गाडीने वैतरणा स्थानकाजवळ वेग कमी केल्याने कैलासने गाडीतून उडी टाकली. मात्र त्याच वेळी मागून येणाऱ्या मालगाडीने त्याचा बळी घेतला.
कैलासचे काका भारत व अक्षय पाटील यांचा ते झांझरोळी डॅममध्ये पोहायला गेले असता बुडून मृत्यू झाला होता. तसेच एक भाऊ नचिकेत पाटील यांचा रुळ ओलांडतांना मृत्यू झाला होता. कैलासचा झालेला मृत्यू हा या घरातला चौथा अपघाती मृत्यू असून मच्छीमारी व्यवसाय करणाऱ्या या कुटुंबांतील दोन खलाशांचा समुद्रात मृत्य झाला होता. वारंवार येणारी ही संकटे टाळण्यासाठी प्रयत्न करणाऱ्या कैलासचाच बळी गेला. त्याच्या पश्चात आई, वडील, पत्नी व दोन वर्षांची मुलगी आहे.