लोकमत न्यूज नेटवर्क, मुंबई: यशवंतराव चव्हाण (मुंबई- पुणे) द्रुतगती मार्गावर हायवे ट्रॅफिक मॅनेजमेंट सिस्टमअंतर्गत मुंबई वाहिनीवर पनवेल एक्झिट व खालापूर टोल प्लाझा व मडप बोगद्यादरम्यान येथे गॅन्ट्री बसविण्याचे काम महाराष्ट्र राज्य रस्ते विकास महामंडळामार्फत ११ जानेवारी रोजी दुपारी १.३० ते ३.३० वाजेदरम्यान करण्यात येणार आहे. गॅन्ट्री बसविण्याच्या काळात हलक्या व जड अवजड वाहनांची वाहतूक पूर्णतः बंद करण्यात येणार आहे.
पुण्याहून मुंबईकडे जाणारी हलकी वाहने व बस या खोपोली एक्झिट येथून वळविण्यात येणार आहेत. राष्ट्रीय महामार्ग क्रमांक ४८ जुना पुणे-मुंबई महामार्गावरून खोपोली शहरातून पुढे शेडुंग टोल नाकामार्गे ही वाहने मुंबई वाहिनीवर मार्गस्थ होतील.