मुंबई : घरगुती भांडणातून पत्नीची हत्या करत पतीने आत्महत्येचा प्रयत्न केल्याची घटना घाटकोपरमध्ये गुरुवारी घडली. या प्रकरणी पंतनगर पोलिसांनी पती शिवशंकर विश्वकर्मा (४५)विरुद्ध हत्येचा गुन्हा दाखल केला आहे. घाटकोपर पूर्वेकडील रमाबाई कॉलनी परिसरात चंद्रकला विश्वकर्मा (४०) ही पती आणि दोन मुलांसोबत राहायची. गेल्या काही दिवसांमध्ये त्यांच्यात खटके उडत होते. याबाबत चंद्रकलाने तिच्या माहेरच्यांना सांगितले. १५ दिवसांपूर्वीच गावी आलेल्या शिवशंकरला बैठक घेऊन समजविण्यात आले.
घरगुती भांडणात माहेरच्यांनी मध्यस्थी घेतलेली शिवशंकरला आवडली नाही. त्यामुळे त्यांच्या भांडणात भर पडली. गुरुवारी सकाळी ७च्या सुमारास यावरून दोघांमध्ये वाद झाले. याच रागात शिवशंकरने घरातील चाकूने तिच्या मानेवर वार केले. त्यानंतर स्वत:च्या पोटावर चाकू मारून आत्महत्येचा प्रयत्न केला. स्थानिकांच्या मदतीने दोघांना जवळच्या रुग्णालयात दाखल केले. तेथे चंद्रकलाला मृत घोषित करण्यात आले. तर शिवशंकरवर उपचार सुरू आहेत. या प्रकरणी चंद्रकलाच्या बहिणीने दिलेल्या तक्रारीवरून पोलिसांनी शिवशंकरविरुद्ध हत्येचा गुन्हा दाखल केला आहे. या प्रकरणी अधिक तपास सुरू असल्याची माहिती पंतनगर पोलीस ठाण्याच्या वरिष्ठ पोलीस निरीक्षक रोहिणी काळे यांनी दिली.