ओम क्रिएशन्सच्या 'स्माईल फेस्ट'मध्ये स्वावलंबनाचा संदेश

ओम क्रिएशन्स ट्रस्टने आपल्या वार्षिक कार्यक्रम 'स्माईल फेस्ट'द्वारे मार्गदर्शन आणि समर्थनाच्या सामर्थ्याचे प्रदर्शन केले.

मुंबई : 'ओम क्रिएशन्स ट्रस्ट'ने आपल्या वार्षिक कार्यक्रम स्माईल फेस्टद्वारे मार्गदर्शन आणि समर्थनाच्या सामर्थ्याचे प्रदर्शन केले. विशेष क्षमताधारक व्यक्तींना समाजात आपले स्थान निर्माण करण्यासाठी प्रेरित करणाऱ्या या ट्रस्टची स्थापना डॉ. राधिका खन्ना यांनी केली आहे. विशेष शिक्षण क्षेत्रातील त्यांच्या भरीव योगदानामुळे हा ट्रस्ट अनेकांना स्वावलंबी होण्यासाठी मार्गदर्शन करत आहे.

कार्यक्रमात ट्रस्टच्या लाभार्थींनी तयार केलेल्या हस्तकला वस्तूंचे प्रदर्शन झाले, ज्यामध्ये क्रोशे कोस्टर्स, टाय-डाय बॅग्स, मातीची भांडी, दिवे, आणि चॉकलेट्स यांचा समावेश होता. प्रत्येक वस्तू लाभार्थींच्या मेहनत, सर्जनशीलता आणि दृढनिश्चयाचे प्रतिबिंब होती. या कार्यक्रमाचे मुख्य आकर्षण होते अभिनेता कुश शाह यांचे आगमन, जे 'तारक मेहता का उल्टा चश्मा' या लोकप्रिय मालिकेतील "गोलू" या भूमिकेसाठी प्रसिद्ध आहेत. शाह यांनी विद्यार्थ्यांशी आणि शिक्षकांशी वेळ घालवला, त्यांच्या प्रयत्नांचे कौतुक केले, फोटो काढले आणि लाभार्थ्यांनी तयार केलेल्या चॉकलेट्सचा आस्वाद घेतला. त्यांच्या उपस्थितीमुळे कार्यक्रमाला उत्साह आणि आनंदाचा माहोल निर्माण झाला.

या प्रदर्शनाबरोबरच ज्ञानवर्धक सत्रांचे आयोजनही करण्यात आले होते. एआय तज्ज्ञ सिद्धेश सुनील घोसाळकर यांनी कृत्रिम बुद्धिमत्तेवरील कार्यशाळा घेतली, ज्यामध्ये एआयचे दैनंदिन जीवनातील उपयोग आणि कार्यक्षमता वाढवण्याच्या शक्यता स्पष्ट केल्या. तसेच उडानचू प्रॉडक्शन्सचे संस्थापक आणि जाहिरात तज्ज्ञ अयान गांगुली यांनी मार्केटिंगवरील सत्र घेतले. त्यांनी हस्तकला वस्तूंच्या कहाण्यांना प्रभावीपणे लोकांपर्यंत पोहोचविण्याच्या उपायांवर भर दिला.

'ओम क्रिएशन्स ट्रस्ट'चे प्रयत्न विविध क्षेत्रांतील व्यक्तींना प्रोत्साहन आणि संधी निर्माण करण्याचे महत्त्व अधोरेखित करतात. या हस्तकला वस्तू फक्त उत्पादने नसून त्या लाभार्थींच्या संघर्ष आणि जिद्दीच्या कहाण्या सांगतात.

'स्माईल फेस्ट'सारखे उपक्रम आपल्याला आठवण करून देतात की, सामूहिक प्रयत्नांमुळे विशेष गरजा असलेल्या व्यक्तींच्या आयुष्यात सकारात्मक बदल घडविता येतो. 'ओम क्रिएशन्स'चा समावेशकता आणि सक्षमीकरणाचा आदर्श हा दाखवतो की योग्य आधार आणि संधी मिळाल्यास प्रत्येक जण अर्थपूर्ण आणि समाधानकारक जीवन जगू शकतो.