मुंबई--बोरिवली पश्चिम आय.सी.कॉलनी व दहिसर पश्चिम कांदर पाडा येथून तीन वातानुकूलित बेस्ट बस सेवा सुरू करण्यात आली. शिवसेना नगरसेविका तेजस्वी घोसाळकर यांच्या पाठपुराव्यामुळे बस क्रमांक २०६ प्रबोधनकार ठाकरेनगर ते आय. सी. कॉलनी, बस क्रमांक २४५ कांदरपाडा बस डेपो ते प्रबोधनकार ठाकरेनगर व बस क्रमांक २४० कांदरपाडा बस डेपो ते शांती आश्रम अशा तीन वातानुकूलित बस सेवा सुरू करण्यात आल्या. या वातानुकूलित बस सेवेचे उद्घाटन शिवसेना उपनेते, म्हाडा सभापती डॉ. विनोद घोसाळकर यांच्या हस्ते करण्यात आले. यावेळी आय. सी. कॉलनीतील प्रवासी मोठ्या संख्येने उपस्थित होते.
घोसाळकर यांनी यावेळी वातानुकूलित बसमधून प्रवास करीत पहिले तिकीट घेतले. तसेच बेस्ट वाहक चालक व प्रवाशांचे पुष्पगुच्छ देऊन स्वागत करण्यात आले. मुंबईकरांना बेस्ट सेवा देण्यासाठी बेस्ट प्रशासन नेहमीच कार्यरत असते, असे प्रशंसोद्गार यांनी काढले. मुंबईकरांसाठी उन्हातान्हाची पर्वा न करता पुराच्या तसेच कोरोनाच्या संकट काळातही बेस्टचे वाहक-चालक नागरिकांची काळजी घेत असल्याचे त्यांनी सांगितले.
याप्रसंगी शिवसेनेचे माजी नगरसेवक, मुंबै बँकेचे संचालक अभिषेक घोसाळकर, शकुंतला शेलार उपविभाग संघटिका, युवा सेनेचे जितेंन परमार व दर्शित कोरगावकर यांच्यासह मोठ्या संख्येने स्थानिक नागरिक उपस्थित होते.