मध्य रेल्वेच्या वक्तशीरपणात विघ्न

गणेशोत्सवकाळात सोडण्यात आलेल्या विशेष ट्रेन आणि गणपती विसर्जनाचे असलेले चार दिवस यामुळे मध्य रेल्वेच्या वक्तशीरपणाला मोठा फटका बसला.

सुशांत मोरे,मुंबई
गणेशोत्सवकाळात सोडण्यात आलेल्या विशेष ट्रेन आणि गणपती विसर्जनाचे असलेले चार दिवस यामुळे मध्य रेल्वेच्या वक्तशीरपणाला मोठा फटका बसला. मध्य रेल्वेच्या उपनगरीय मार्गावर प्रत्येक दिवशी जवळपास २५0 लोकल गाड्यांना लेटमार्क लागल्याचे एका वरिष्ठ अधिकाऱ्याने सांगितले. त्यामुळे या १० दिवसांत लोकलने प्रवास करणाऱ्या प्रवाशांनाही लेटमार्कलाच सामोरे जावे लागले.
१७ सप्टेंबर रोजी गणपतींचे आगमन झाले. तत्पूर्वी गणेशोत्सवानिमित्त कोकणात जाणाऱ्या चाकरमान्यांसाठी मध्य रेल्वेकडून विशेष ट्रेन सोडण्याचा निर्णय घेण्यात आला आणि यावेळी २६0 पेक्षा जास्त ट्रेन सोडण्यात आल्या. मागील वर्षी विशेष ट्रेनची हीच संख्या २१४ एवढी होती. या ट्रेन १७ सप्टेंबरपूर्वीच मध्य रेल्वेकडून सोडण्यास सुरुवात झाली आणि २७ सप्टेंबर अनंत चतुदर्शीच्या नंतरही या ट्रेन धावत होत्या.
कोकणवासियांची गैरसोय टाळण्यासाठी सोडण्यात आलेल्या विशेष ट्रेनचे नियोजन मात्र मध्य आणि कोकण रेल्वेकडून व्यवस्थित करण्यात न आल्याने या ट्रेनचेही वेळापत्रक चांगलेच बिघडल्याचे निदर्शनास आले. त्यामुळे त्याचा फटका गणेशोत्सव काळातील पंधरा दिवसात मध्य रेल्वे मार्गावरील लोकल गाड्यांना बसला. तसेच दीड दिवसांच्या गणपतींचे विसर्जनाबरोबरच पाच, सात आणि दहा दिवसांच्या गणपतींच्या विसर्जनासाठीही मेन लाईन आणि हार्बरवरील फाटक काही वेळांसाठी सातत्याने उघडण्यात आल्याने वक्तशीरपणा बिघडण्यात याचीही भर पडली. एकूणच गणेशोत्सवकाळातील पंधरा दिवसांत प्रत्येक दिवशी जवळपास २५0 लोकल गाड्यांना लेटमार्क लागत होता, असे मध्य रेल्वेतील वरिष्ठ अधिकाऱ्याकडून सांगण्यात आले. त्या पंधरा दिवसांत मध्य रेल्वेचा वक्तशीरपणा हा फक्त ७८ टक्के एवढा होता.
मागील वर्षी गणेशोत्सवा दरम्यान वक्तशीरपणाची टक्केवारी ८२ टक्के एवढी होती. यंदा गणेशोत्सवात हीच टक्केवारी फारच घसरली. त्यामुळे त्या पंधरा दिवसांत लोकल प्रवाशांना मात्र मोठ्या मनस्तापाला सामोरे जावे लागले.
मध्य रेल्वेच्या मेन लाइनवर मुंबईतून जाताना आणि मुंबईत येणाऱ्या लांब पल्ल्याच्या गाड्यांना प्रथम मार्ग करून द्यावा लागतो. त्यानंतरच लोकल गाड्यांना सिग्नल दिला जातो. मध्य रेल्वे मार्गावरुन जाणाऱ्या नियमित मेल-एक्सप्रेसबरोबरच विशेष एक्सप्रेस गाड्यांना असाच मार्ग करून द्यावा लागत असल्याने त्याचा फटका बसला.
मध्य रेल्वेच्या मेन लाईनवर दिवा, कळवा, ठाकुर्ली या महत्त्वाच्या फाटकांसह हार्बरवर चुनाभट्टीचा फाटक असून स्थानिकांना गणपती विसर्जनासाठी हे फाटक सातत्याने उघडावे लागत होते.