मनोहर कुंभेजकर
मुंबई : फक्त शिवाजी नाही, छत्रपती शिवाजी महाराज मुंबईविमानतळ. आता छत्रपती शिवाजी महाराज आंतरदेशीय व आंतरराष्ट्रीय विमानतळ या दोन्ही विमानतळांची अशा प्रकारे जगाला ओळख होणार आहे. केंद्रीय हवाई वाहतूकमंत्री सुरेश प्रभू यांनी गुरुवारी ट्विट करत याची माहिती दिली. ‘महाराष्ट्रातील जनतेचे मी अभिनंदन करत असून त्यांची अनेक वर्षांची ही मागणी पूर्ण केल्याबद्दल पंतप्रधान नरेंद्र मोदी यांचे आभार मानतो,’ असेही त्यांनी म्हटले आहे. खासदार गोपाळ शेट्टी यांनी ही घटना मुंबईकर व देशवासीयांना अभिमान वाटावा अशी असल्याचे सांगितले.
मुंबईतील विमानतळाच्या नावात महाराज ही उपाधीच निर्देशित करण्यात आलेली नव्हती. लोकमतने याबाबत वारंवार आवाज उठवला होता. १९९० पासून महाराज ही उपाधी निर्देशित करण्यासाठी वॉच डॉग फाउंडेशनचे विश्वस्त अ‍ॅड. ग्राडफे पिमेंटा व निकोलस अल्मेडा यांनीदेखील प्रयत्न केले आहेत. खासदार शेट्टी म्हणाले, पंतप्रधान नरेंद्र मोदी व मुख्यमंत्री देवेंद्र फडणवीस हे स्वत: शिवप्रेमी आहेत. २०१४ च्या निवडणुकीच्या प्रचाराचा शुभारंभ पंतप्रधानांनी रायगड किल्ल्यावर जाऊन नारळ फोडून केला होता. महाराज ही उपाधी या दोन्ही विमानतळांच्या नामकरणात निर्देशित करण्यासाठी शिवप्रेमी म्हणून आपण स्वत: पंतप्रधान व प्रभू यांच्याकडे आवाज उठवला. मागणी पूर्ण झाली.
शिवसेनेचे आमदार अनिल परब यांच्या नेतृवाखाली शिवसैनिकांनी व महिला आघाडीने महिनाभरापूर्वी महाराज या उपाधीसाठी गनिमी कावा करत सांताक्रुझ पूर्व येथील आंतरदेशीय विमानतळावर आंदोलन केले होते. महाराज उपाधी लागण्याचे श्रेय सेनेचे असल्याचा दावा शिवसेनेकडून करण्यात आला आहे.