५ आयपीएस अधिकाऱ्यांच्या बदल्या
लोकमत न्यूज नेटवर्क
मुंबई : राज्य पोलीस दलातील विशेष पोलीस महानिरीक्षक कैसर खालिद यांची लोहमार्ग पोलिसांच्या आयुक्तपदी नियुक्ती करण्यात आली. त्यांच्यासह ५ आयपीएस अधिकाऱ्यांच्या बदलीचे आदेश गृहविभागाने सोमवारी जारी केले.
सुमारे साडेतीन महिन्यांपूर्वी कैसर खालिद यांची बदली नागरी हक्क संरक्षण विभागातून (पीसीआर) पोलीस प्रशिक्षण विभागात करण्यात आली होती. मात्र ते हजर झाले नव्हते. त्यांच्याकडे रेल्वेच्या आयुक्तपदाची धुरा सोपविण्यात आली आहे. तेथील मावळते आयुक्त रवींद्र सेनगावकर यांची प्रशिक्षण विभागात महानिरीक्षक म्हणून बदली करण्यात आली आहे. लाचलुचपत प्रतिबंधक विभागातील ठाणे विभागाचे अधीक्षक महेश पाटील यांची मीरा-भाईंदर पोलीस आयुक्तालयात उपायुक्त (गुन्हे) म्हणून बदली केली आहे. त्यांच्या जागी नियुक्तीच्या प्रतीक्षेत असलेल्या पंजाबराव उगले यांची नियुक्ती करण्यात आली असून नाशिक पोलीस अकादमीत बदली झालेल्या संजय शिंत्रे यांची महाराष्ट्र सायबर शाखेत पोलीस अधीक्षक म्हणून नियुक्ती करण्यात आली आहे. ते अकादमीत ते हजर झाले नव्हते.
......................