कुणबी, मराठाशी : दस्तऐवज २४ नाव्हेंबरपर्यंत स्वीकारणार

मुंबई शहर, उपनगरासाठी व्यवस्था

लोकमत न्यूज नेटवर्क 
मुंबई : मुंबई शहर जिल्ह्यातील नागरिकांकडे कुणबी, मराठा कुणबी व कुणबी मराठा या जातींचा नामोल्लेख असलेले उपलब्ध दस्तऐवज/ पुरावे आहेत, त्यांनी मुंबई शहर जिल्हाधिकारी कार्यालयात विशेष मोहिमेदरम्यान २१ ते २४ नाव्हेंबर या कालावधीत सादर करण्याचे आवाहन मुंबई शहरचे उपजिल्हाधिकारी  कल्याण पांढरे यांनी केले आहे.

मराठा आरक्षणासंदर्भात न्या. संदीप शिंदे (निवृत्त) यांच्या अध्यक्षतेखाली समिती गठित करण्यात आली आहे. या समितीद्वारे प्राप्त निर्देशानुसार मुंबई शहर जिल्ह्यातील नागरिकांकडे १९४८ पूर्वीचे तसेच १९४८ ते १३ ऑक्टोबर १९६७ या कालावधीतील कुणबी, मराठा कुणबी व कुणबी मराठा या जातींचा नामोल्लेख असलेले पुरावे, वंशावळ, शैक्षणिक व महसुली पुरावे, जुन्या सनदा, राष्ट्रीय दस्तऐवज इत्यादी जुने अभिलेखे स्वीकारले जाणार आहेत. 

 ते उपलब्ध असल्यास मुंबई जिल्ह्यातील जिल्हाधिकारी कार्यालयातील तळमजल्यावरील नियोजन भवन येथे २१ नोव्हेंबर ते २४ नोव्हेंबर या कालावधीत सकाळी १० ते सायंकाळी ६ पर्यंत विशेष कक्षात स्वीकारले जाणार असल्याची माहिती उपजिल्हाधिकारी पांढरे यांनी दिली आहे.
 अधिक माहितीसाठी ०२२-२२६६४२३८ किंवा gadmumbaicity@gmail.com या ई-मेलवर संपर्क साधावा, असेही आवाहन करण्यात आले आहे.