"आम आदमी पार्टीला महानगरपालिका निवडणुकीत मिळालेला विजय ही सुरुवात असून यापुढे मुंबई महानगरपालिकेत आप स्वबळावर दणदणीत विजय मिळवेल आणि महानगरपालिकेत आप चा झेंडा फडकावेल," असा विश्वास आम आदमी पार्टीच्या मुंबई अध्यक्षा प्रीती शर्मा मेनन यांनी विजयाच्या जल्लोषादरम्यान व्यक्त केला.
मुंबई अध्यक्षा प्रीती शर्मा मेनन यांच्या अध्यक्षतेखाली झालेल्या या जल्लोषात मुंबई सह महाराष्ट्रातील सर्व नेते व कार्यकर्ते उपस्थित होते. ढोल- ताशांचा कडकडाट आणि कार्यकर्त्यांच्या घोषणांच्या दणदणाटात गुलालाची उधळण करून आपनं दिल्ली महानगरपालिकेवरील विजय साजरा केला.
"दिल्ली महानगरपालिका निवडणुकीनंतर मुंबई निवडणूक शिल्लक आहे. मुंबई महानगरपालिका निवडणुकीत आप दणदणीत विजय मिळवेल. दिल्ली नंतर मुंबईतही आप स्वबळावर सरकार आणेल. मुंबई महानगरपालिकेत आपचा झेंडा फडकवायचा आहे. दिल्लीत आम आदमीचे सरकार आले आहे, आता जनता भ्रष्ट्राचारी सरकारला आपली जागा दाखवून देईल," असे मत प्रीती शर्मा मेनन यांनी व्यक्त केले.