आज आणि उद्या पहाटे ५ पर्यंत मद्य विक्रीची परवानगी

नाताळ व नववर्षाच्या निमित्ताने ही विशेष सूट देण्यात आली आहे.

मुंबई : नाताळ व नववर्षाच्या निमित्ताने २४ डिसेंबर, २५ डिसेंबर व ३१ डिसेंबर या दिवशी हॉटेल्स व क्लबमधून पहाटे पाच वाजेपर्यंत मद्यविक्री करण्यास परवानगी देण्यात आली आहे. तर, मद्य विक्री करणाऱ्या दुकानांना रात्री १ पर्यंत दुकाने सुरू ठेवून मद्य विक्री करता येणार आहे.

राज्य उत्पादन शुल्क विभागाने या संदर्भात शुक्रवारी आदेश जारी केले आहेत. मुंबईत हॉटेल्स व क्लबमधून रात्री १२ वाजेपर्यंत मद्यविक्रीस एरवी परवानगी असते तर मद्याच्या दुकानांतून रात्री साडे दहापर्यंत मद्यविक्रीस मुभा आहे. मात्र, नाताळ व नववर्षाच्या निमित्ताने ही विशेष सूट देण्यात आली आहे. यंदाच्या वर्षी नाताळ व नववर्ष संध्या हे दोन्ही दिवस अनुक्रमे रविवार व शनिवार असे आले आहेत. तसेच नाताळच्या आदल्या रात्री शनिवार आहे. या तीनही दिवशी दुकाने, हॉटेल्स व क्लब उशिरापर्यंत सुरू राहतील.