मॉर्निंगवॉकला गेलेल्या व्यक्तीवर चॉपरने हल्ला करून लूटमार

लोकमत न्यूज नेटवर्क

मुंबई : खारच्या कार्टर रोड परिसरात मॉर्निंगवॉकला गेलेल्या स्थानिकावर चॉपर हल्ला करत त्यांना लुबाडण्यात आले. या प्रकरणी पोलिसांनी तिघांच्या मुसक्या आवळल्या आहेत.

मंगळवारी पहाटे साडेचारच्या सुमारास ३३ वर्षीय तक्रारदार कार्टर रोड येथे मॉर्निंगवॉकसाठी गेले होते. त्या वेळी तीन सशस्त्र आरोपींनी चॉपरच्या साह्याने हल्ला करून त्यांना जखमी केले. त्यानंतर त्यांच्या जवळील मोबाइल व हेडफोन जबरीने हिसकावत पळ काढला. मुख्य म्हणजे जखमी फिर्यादीच्या मदतीला आलेल्या दोन महिलांनाही धमकावून त्यांचाही मोबाइल चोरण्याचा प्रयत्न केला. मात्र त्यानंतर ते तिघे पळून जाण्याच्या प्रयत्नात असताना रात्रपाळी गस्तीवरील खार व वांद्रे पोलिसांनी तत्काळ घटनास्थळी धाव घेऊन दोघांना पकडले. तिसरा आरोपी पळून जाण्यात यशस्वी झाल्याने त्याला खार पोलीस ठाण्याच्या गुन्हे प्रकटीकरण पथकाने बैंगनवाडी, शिवाजीनगर येथून सायंकाळी ताब्यात घेतले. तीनही आरोपींकडून चोरी केलेला मुद्देमाल तसेच चॉपर हस्तगत करण्यात आले आहे. यापूर्वी घाटकोपरमध्येही त्यांनी असाच प्रकार केल्याची कबुली दिली आहे. त्यानुसार तो मुद्देमालही हस्तगत करण्यात आल्याचे खार पोलिसांकडून सांगण्यात आले.