पालघरमध्ये मंगळसूत्र चोरीस

तृप्ती संखे (३२) या महिलेला धक्का देत तिच्या गळ्यातील साडेतीन तोळ्याचे सोन्याचे मंगळसुत्र काल मोटरसायकल वरून आलेल्या दोन अज्ञात चोरट्यांनी चोरून नेले

पालघर : येथील चार रस्त्यावरून आपल्या घराकडे जाणा-या तृप्ती संखे (३२) या महिलेला धक्का देत तिच्या गळ्यातील साडेतीन तोळ्याचे सोन्याचे मंगळसुत्र काल मोटरसायकल वरून आलेल्या दोन अज्ञात चोरट्यांनी चोरून नेले.पालघरच्या सुखशांती अपार्टमेंट मध्ये राहणारी तृप्ती संखे या आपल्या आठ वर्षीय मुलीसह बोईसर वरून सहाआसनी रिक्षाने पालघरच्या चार रस्त्यावर संध्याकाळी साडेसहा वाजता उतरल्या. माहिम हायवे रस्त्यावरून आपल्या घराकडे जात असताना समोरून एका बिना नंबरप्लेट वरून आलेल्या मोटर सायकलस्वाराने फिर्यादी तृप्ती संखे यांच्या गळ्यावर फटका मारून तिच्या गळ्यातील साडेतीन तोळ्याचे सोन्याचे मंगळसुत्र घेवून निघुन गेले. यावेळी संखे यांनी आरडाओरड केल्याने जवळच उभ्या असलेल्या राज त्रिपाठी यांनी त्या चोरट्यांचा पाठलाग केला. परंतु तो अपयशी ठरला. चाररस्त्याच्या सर्कलवर सीसीटीव्ही कॅमेरे लावण्यात आले असून ही घटना घडली त्यावेळी नेमके सीसीटीव्ही कॅमेरे बंद पडल्याची माहिती फिर्यादीच्या नातेवाईकांनी दिली. (वार्ताहर)