‘म्हाडा’ने दिली रहिवासी आणि भाडेकरूंसाठी आनंदाची बातमी

ई-बिलिंग प्रणालीमुळे चार मंडळांमधील गाळेधारकांना सेवाशुल्क भरण्याकरिता ऑनलाइन पेमेंटचा पर्याय उपलब्ध आहे.

मुंबई : म्हाडाच्या कोकण, पुणे, नागपूर, अमरावती विभागीय मंडळांच्या वसाहतींमधील रहिवासी आणि भाडेकरूंना सेवाशुल्क ऑनलाइन भरता यावे, याकरिता निर्मित ई-बिलिंग संगणकीय प्रणाली सेवेचे उद्घाटन सोमवारी वांद्रे पूर्व येथील म्हाडा मुख्यालयात करण्यात आले. या सेवेमुळे लाखो नागरिकांना घरबसल्या सेवाशुल्क अदा करता येणार आहे.

ई-बिलिंग प्रणालीमुळे चार मंडळांमधील गाळेधारकांना सेवाशुल्क भरण्याकरिता ऑनलाइन पेमेंटचा पर्याय उपलब्ध आहे. गाळेधारकांना लवकरच सेवाशुल्काचे बिल त्यांच्या ई-मेलवर येईल आणि संदेश मिळेल. 

नवीन प्रणाली कशी आहे? 

  संकेतस्थळावर सिटीझन कॉर्नर विंडोअंतर्गत ही सेवा आहे.
  प्रत्येकासाठी एक युनिक कन्झ्युमर क्रमांक तयार आहे. हा क्रमांक वापरून संकेतस्थळावर लॉग इन करावे.
   देयक अदा करणाऱ्याचे नाव, देयकाची रक्कम, मोबाइल क्रमांक व ईमेल आयडी टाकला की ‘पे’ या बटणावर क्लिक करावे. त्यावर क्लिक करताच पेमेंट गेटवे ओपन होईल.
  रक्कम खात्यातून वळती झाल्यानंतर लगेचच पोच मिळेल. 
  डेबिट कार्ड, क्रेडिट कार्ड, इंटरनेट बँकिंग, यूपीआय तसेच गुगल पे वापरून देयक अदा करता येणार आहे.

गाळेधारकांच्या तक्रारींकरिता ई-बिलिंगच्या संकेतस्थळावर मिळकत व्यवस्थापननिहाय मेलबॉक्स उपलब्ध आहे, अशी माहिती म्हाडाचे उपाध्यक्ष संजीव जयस्वाल यांनी दिली. मुंबई, औरंगाबादमध्ये यापूर्वीच ई-बिलिंग प्रणाली सुरू आहे.