… पण आता मातोश्रीच्या आत राहणारे थरथर कापायला लागलेत; शालिनी ठाकरेंचा मुख्यमंत्र्यांवर निशाणा

आता कुणीतरी 'मातोश्री'वर येणार म्हणून बंगलाधारकांच्या मनात धडकी भरते, मनसेचा टोला.

कितीही विरोध झाला तरी शनिवारी सकाळी मातोश्रीवर हनुमान चालिसा पठण करण्यासाठी जाणार असल्याचे आमदार रवी राणा यांनी स्पष्ट केलं. मातोश्रीबाहेर शुक्रवारी सकाळपासूनच राजकीय वातावरण तापलं होतं. शेकडो शिवसैनिक राणा दाम्पत्याविरोधात घोषणाबाजी करत होते. त्यानंतर सायंकाळी साडेचार वाजताच्या सुमारास मुख्यमंत्री उद्धव ठाकरे स्वत: मातोश्रीवर दाखल झाले. त्यांनी मातोश्रीबाहेर जमलेल्या सर्व शिवसैनिकांचे हात जोडून आभार मानले. दरम्यान, या प्रकरणावरून मनसेच्या सरचिटणीस शालिनी ठाकरे यांनी जोरदार निशाणा साधला आहे. 

“मातोश्रीचा दरारा असा होता की, समोरचा नुसता थरथर कापायचा. पण आता मातोश्रीच्या आत राहणारे थरथर कापायला लागले आहेत…!!!,” असं म्हणत शालिनी ठाकरे यांनी मुख्यमंत्री उद्धव ठाकरे यांच्यावर जोरदार टीका केली. त्यांनी ट्विटरच्या माध्यमातून निशाणा साधला.

मातोश्री चा दरारा असा होता की, समोरचा नुसता थरथर कापायचा पण आता मातोश्रीच्या आत राहणारे थरथर कापायला लागले आहेत.....!!!#शोकांतिका#HanumanChalisa#Matoshree

— Shalini Thackeray (@ThakareShalini) April 22, 2022

किर्तिकुमार शिंदेंनीही साधला निशाणा
“जेव्हा बाळासाहेब होते, तेव्हा 'मातोश्री'तून नुसता फोन आला, कुणाला बोलावलं तर समोरच्याच्या मनात धडकी भरायची! आता कुणीतरी 'मातोश्री'वर येणार म्हणून बंगलाधारकांच्या मनात धडकी भरते!!,” असं म्हणत मनसेचे सरचिटणीस किर्तिकुमार शिंदे यांनी ट्विटरच्या माध्यमातून निशाणा साधला.

जेव्हा बाळासाहेब होते, तेव्हा 'मातोश्री'तून नुसता फोन आला, कुणाला बोलावलं तर समोरच्याच्या मनात धडकी भरायची!

आता कुणीतरी 'मातोश्री'वर येणार म्हणून बंगलाधारकांच्या मनात धडकी भरते!!— Kirtikumar Shinde (@KirtikumrShinde) April 22, 2022

विरोध झाला तरी…
कितीही विरोध झाला तरी शनिवारी सकाळी मातोश्रीवर हनुमान चालिसा पठण करण्यासाठी जाणार असल्याचे आमदार रवी राणा यांनी स्पष्ट केले आहे. आम्हाला होणाऱ्या विरोधाची पर्वा न करता आम्ही हनुमान चालिसा वाचणार असल्याचे त्यांनी म्हटलं. आमदार रवी राणा आणि खासदार नवनीत राणा यांनी मुंबईत पत्रकार परिषद घेत मुख्यमंत्री उद्धव ठाकरे आणि शिवसेनेवर निशाणा साधला.