मुंबईत भरधाव जॅग्वार कारच्या धडकेत चार जण जखमी

कार चालकाला जमावाकडून बेदम मारहाण

मुंबई: अंधेरीतील वर्सोवा येथे भरधाव जॅग्वार कारच्या धडकेत चार जण जखमी झाले आहेत. काल रात्री हा अपघात झाला. अपघातातील जखमींना रुग्णालयात दाखल करण्यात आलं आहे. कार चालक मद्यधुंद अवस्थेत असल्यानं हा अपघात झाल्याची माहिती काही प्रत्यक्षदर्शींनी दिली. मात्र पोलिसांनी अद्याप या माहितीला दुजोरा दिलेला नाही. अंधेरीत कार चालकानं भरधाव वेगात चौघांना धडक दिली. मात्र यानंतरही त्याला कारवर नियंत्रण मिळवता आललं नाही. त्यामुळे कारनं आणखी आठ वाहनांना धडक दिली. यानंतर जमलेल्या गर्दीनं कार चालकाला पकडलं आणि त्याला बेदम चोप दिला. जमावानं जॅग्वार कारचीही तोडफोड केली. हितेश गोलच्चा असं कार चालकाचं नाव असल्याची माहिती समोर आली आहे. जमावानं केलेल्या मारहाणीत हितेश जखमी झाला असून त्याला उपचारांसाठी पोलिसांनी रुग्णालयात दाखल केलं आहे. या अपघातातील जखमींवर कूपर आणि कोकिलाबेन रुग्णालयात उपचार सुरू आहेत.