अरविंद सावंतांच्या नावाने मागवले २ लाखांचे जेवण; 'बडेमिया'च्या मालकाची तक्रार, तोतया 'पीए'ला अटक!

खासदार अरविंद सावंत यांच्या नावाने फसवणूक करणाऱ्या आरोपीला मुंबई पोलिसांनी अटक केली आहे.

Mumbai Crime : मुंबईतून एक धक्कादायक बातमी समोर आली आहे. मुंबईतील प्रसिद्ध बडेमिया हे हॉटेल पुन्हा एकदा चर्चेत आले आहे. बडेमिया हॉटेलच्या मालकाची तब्बल १२ लाखांची फसवणूक करण्यात आली आहे. शिवसेना ठाकरे गटाचे खासदार अरविंद सावंत यांचा स्वीय सहाय्यक असल्याची बतावणी करुन एका व्यक्तीने बडेमियाच्या मालकाची फसवणूक केली. आरोपीने बिर्याणी आणि गुलाब जामुनसह शेकडो खाद्यपदार्थ मागवून पैसेच दिले नसल्याचे समोर आलं आहे.आरोपीने तसेच रेस्टॉरंट मालकाच्या मुलीला लॉ कॉलेजमध्ये प्रवेश मिळवून देतो असे सांगत आणखी पैसे मागितले होते. तक्रारीनंतर पोलिसांनी याप्रकरणी गुन्हा दाखल करुन तपास सुरु केला आहे.

खासदार अरविंद सावंत यांचा स्वीय सहाय्यक असल्याचा दावा करणाऱ्या एकाने बडेमियाचे मालक जमाल शेख यांची लाखोंची फसवणूक केल्याने खळबळ उडाली आहे. आरोपीने जमाल शेख यांच्या यांच्या मुलीला शासकीय विधी महाविद्यालयात प्रवेश देण्याचे आश्वासन देऊन १२ लाखांची फसवणूक केली आहे. या फसवणुकीत खासदाराच्या पक्षाच्या शेकडो कार्यकर्त्यांचा दावा असलेल्या कॉन्मनने दिलेल्या अन्नासाठी पैसे न देणे समाविष्ट आहे. आरोपीने वेळोवेळी अरविंद सावंत यांच्या कार्यकर्त्यांना जेवण द्यायचे असल्याचे सांगून बिर्याणी आणि गुलाब जामुनदेखील पैसे न देता मागवले होते. याप्रकरणी तक्रार दाखल होताच काळाचौकी पोलिसांनी मंगळवारी सूरज काळव याला अटक करून त्याच्याविरुद्ध फसवणुकीचे चार गुन्हे दाखल केले.

जमाल मोहम्मद यासीन शेख (५४) यांनी दिलेल्या तक्रारीनंतर पोलिसांनी एफआयआर अहवाल नोंदवला होता. सूरज नावाच्या एका व्यक्तीने शेख यांना फोन करून सावंत यांचा पीए असल्याचे सांगत जुलैपासून अनेकवेळा जेवणाची ऑर्डर दिली. त्यापैकी एक ऑर्डर २०० प्लेट बिर्याणी आणि गुलाब जामुनची होती. शेख यांनी सूरजकडे जेवणाच्या पैशांची मागणी केली तेव्हा त्याने अरविंद सावंत हे एकाच वेळी सगळे पैसे दिले जातील असे सांगितले होते.

जमाल शेख यांनी  यापूर्वी अरविंद सावंत यांच्यासाठी जेवण पुरवले होते. त्यावेळी त्यांनी तात्काळ पैसे दिल्याने शेख यांनी सूरजला पार्सल पाठवले. त्यांनी सूरजने दिलेल्या ठिकाणांवर अनेक वेळा जेवण पाठवले. एकदा, सूरजने त्यांना सांगितले की मिलिंद नार्वेकर यांनी विधानपरिषदेची जागा जिंकली होती म्हणून भायखळ्यातील पत्त्यावर २०० लोकांसाठी जेवण पाठवणे आहे. या ऑर्डरमध्ये शाकाहारी आणि मांसाहारी बिर्याणी आणि गुलाब जामुन असायला हवेत असे सूरजने शेख यांना सांगितले होते. त्यानंतर, सूरजने पुन्हा ४० लोकांसाठी जेवण मागवले.

 शेख यांनी मधल्या काळात सूरजला आपल्या मुलीला चर्चगेट येथील लॉ कॉलेजमध्ये प्रवेश मिळवून देऊ शकतो का असे विचारले. त्यावर मी आमदार-खासदारांशी बोलून काम करून घेतो, असे सूरजने शेख यांना सांगितले. त्यानंतर शेख यांनी सूरजला तीन लाख रुपयांचे डोनेशन दिलं. त्यानंतर सूरजने कॉलेजची फी, ट्रस्टीला देण्यासाठी पैसे आणि इतर विविध कारणांसाठी शेख यांच्याकडून रक्कम उकळली. सूरजने शेख यांच्याकडून ९.२७ लाख रोख आणि यूपीआद्वारे पैसे घेतले होते.

जुलैच्या शेवटच्या आठवड्यात, सूरजने शेख यांना फोन केला आणि कॉलेजमध्ये प्रवेश मिळवण्यासाठी डोनेशन द्यावे लागेल असं सांगितलं होतं. शेख यांनी यासाठी सहमती दर्शवली. सुरुवातीला, कॉलेजची फी भरण्याच्या बहाण्याने त्याने ४९,००० रुपये घेतले. नंतर त्याने ३ लाख रुपये डोनेशन, अतिरिक्त फी, रजिस्ट्रेशन इत्यादीसाठी आणि ट्रस्टींसाठी ४ लाख रुपये घेतले, अशी माहिती शेख यांनी दिली.

सूरजने परळ येथील भारत माता सिनेमाजवळ शेख यांच्याकडून पैसे घेतल्याने काळाचौकी पोलीस ठाण्यात त्याच्याविरुद्ध कलम २०४, ३१६(२) आणि ३१८(४) नुसार गुन्हा दाखल करण्यात आला आहे.