मुंबई : फोर्ट येथील हिमालय पुलाच्या दुर्घटनेनंतर भविष्यात दुर्घटना घडून नाहक बळी जाऊ नयेत यासाठी महापालिकेने कंबर कसली आहे. पालिकेने परीक्षण करत २९ पुलांचे पाडकाम व पुनर्बांधणीचे काम हाती घेतले आहे. २९ पुलांपैकी आतापर्यंत ८ पूल पाडण्यात आले असून १२ पुलांचा वापर पूर्णपणे बंद करण्यात आला आहे. लवकरच ते पूलही पाडण्यात येणार आहेत. तर उर्वरित ९ पूल लवकरच बंद करून ते पाडण्यात येतील. मात्र महापालिकेने ऐन पावसाळ्यात या कामाला सुरुवात केल्याने मुंबईकरांची कोंडी होण्याची शक्यता आहे.
मुंबई महापालिकेच्या अखत्यारीत ३४४ पूल आहेत. यापैकी ३०४ पुलांचे स्ट्रक्चरल ऑडिट प्रगतिपथावर आहे. परीक्षणानुसार २९ पूल धोकादायक असल्याचे निदर्शनास आले आहे. यामध्ये पादचारी पुलांसह वाहतूक पुलांचाही समावेश आहे. मुंबईकरांच्या सुरक्षेला प्राधान्य देत महापालिकेने या पुलांचे निष्कासन व पुनर्बांधणीचे काम हाती घेतले आहे. या कामादरम्यान मुंबईकरांना कमीतकमी त्रास व्हावा, याचेही नियोजन महापालिकेच्या स्तरावर करण्यात येत आहे.
या पुलांचे निष्कासन व पुनर्बांधणीचे काम मुंबई महापालिकेच्या पूल खात्याद्वारे रात्रंदिवस पद्धतीने करण्यात येत आहे. जेणेकरून पुलासंदर्भातील सर्व कामे लवकरात लवकर पूर्ण होऊन येथील वाहतूक सुरळीत होऊ शकेल, असे पूल खात्याचे प्रमुख अभियंता संजय दराडे यांनी सांगितले.
महानगरपालिकेच्या अखत्यारीत ३४४ पूलमुंबई महानगरपालिकेच्या अखत्यारीत एकूण ३४४ पूल आहेत. ऑक्टोबर २०१६ ते ऑगस्ट २०१८ या कालावधीदरम्यान २९६ पुलांचे संरचनात्मक परीक्षण करण्यात आले. परीक्षण करताना नुकतेच बांधलेले, हस्तांतरित झालेले ४८ पूल वगळता उर्वरित २९६ पुलांचे परीक्षण करण्यात आले. या परीक्षणाअंती १४ पूल धोकादायक असल्याचे आढळले.
ऑक्टोबर २०१६ ते ऑगस्ट २०१८ दरम्यान पहिल्या परीक्षणादरम्यान धोकादायक असल्याचे आढळून आलेले १४ पूल व दुसऱ्या परीक्षणादरम्यान धोकादायक असल्याचे आढळून आलेले पूर्व व पश्चिम उपनगरातील १५ पूल यानुसार एकूण २९ पूल धोकादायक असल्याचे आढळून आले आहे.
हिमालय पूल दुर्घटनेनंतर महापालिकेच्या अखत्यारीतील ३०४ पुलांचे स्ट्रक्चरल ऑडिट करण्याचा निर्णय घेण्यात आला. यामध्ये पूर्व उपनगरातील ६६ तर पश्चिम उपनगरातील १५७ यानुसार आतापर्यंत २२३ पुलांचे स्ट्रक्चरल ऑडिट नव्याने करण्यात आले. यात १५ पूल धोकादायक आढळले. मुंबई शहरात नवीन संरचनात्मक परीक्षक नेमण्याची निविदा प्रक्रिया राबविण्यात आली. शहरातील ८१ पुलांच्या संरचनात्मक परीक्षणासाठी नवीन संरचनात्मक परीक्षकांची नेमणूक करण्यात आली. २९ पुलांपैकी ३ पुलांच्या पुनर्बांधणीचे कार्यादेश यापूर्वीच देण्यात आले आहेत. ७ पुलांची माहिती स्थायी समितीला देण्यात आली आहे. ५ पुलांबाबत निविदा प्रक्रिया आता अंतिम टप्प्यात आहे.
| पूल | प्रकार | सद्यस्थिती | पूल | प्रकार | सद्यस्थिती |
| यल्लो गेट पूल | पादचारी | पाडला | प्रेम नगर नाला, एस.व्ही. रोड, | वाहतूक | बंद करणार |
| महर्षी कर्वे रोड, चंदनवाडी (द.) | पादचारी | पाडला | बाटा शोरूम, मालाडगांधी नगर, कुरार व्हिलेज पूल | वाहतूक | बंद |
| महर्षी कर्वे रोड, चंदनवाडी (उ.) | पादचारी | पाडला | ओशिवरा नाला, एस.व्ही. रोड | वाहतूक | बंद करणार |
| वाकोला नाल्यावरील हंस भुग्रामार्गावरील पूल | वाहतूक | कार्यवाही | पिरामल नाला, लिंक रोड | वाहतूक | बंद |
| हंस भुग्रा मार्ग,पाइपलाइन सर्विस रोड पूल | वाहतूक | बंद | चंदावाडकर नाला १२० फूट लिंक रोड, मालाड | वाहतूक | बंद |
| जुहू तारा रोड पूल | वाहतूक | वापरात | फॅक्टरी लेन, बोरीवली | वाहतूक | बंद करणार |
| धोबी घाट, मज्जास नाला पूल | वाहतूक | बंद | एस.बी.आय. कॉलनी,वैभव को-ऑप. हा.सो.लि. | वाहतूक | बंद |
| मेघवाडी नाला, श्यामनगर | वाहतूक | बंद करणार | रतन नगरपासून दौलत नगर पूल | वाहतूक | बंद |
| वांद्रे-धारावी रोड पूल | वाहतूक | बंद करणार | खैरानी रोडवरीलहरी मशीद नाल्यावरील पूल | वाहतूक | पाडला |
| बिहारी टेकडी ब्रिज | वाहतूक | बांधकाम कार्यवाही | रमाबाई पाडा गुरुनानक नगर,मुलुंड कॉलनी | पादचारी | पाडला |
| वालभट्ट नाला येथील पूल, वालभट्ट रोड, गोरेगाव (पूर्व) | वाहतूक | बंद | संत मुक्ताबाई हॉस्पिटलजवळील, बर्वे नगर | पादचारी | पाडला |
| विठ्ठल मंदिर, ईरानी वाडीयेथील पूल, रगडा पाडा | वाहतूक | बंद | पॅन्थर नगरजवळ, विक्रोळी (पू.) | वाहतूक | बंद करणार |
| एस.व्ही.पी. रोड, कृष्ण कुंजबिल्डिंगजवळील पूल | वाहतूक | बंद | रेनीसन्स हॉटेलजवळील पूल, पवई | पादचारी | पाडला |
| आकुर्ली रोड येथील पूल,हनुमान नगर, धर्मराज डेरीजवळ | वाहतूक | बंद | लक्ष्मी बाग कल्वर्टनीलकंठ नाला पूल, घाटकोपर | वाहतूक | बंद |