प्रेमप्रकरणातून भररस्त्यात प्रेयसीची हत्या

११ वर्षांपासून असलेल्या प्रेमसंबंधांनंतर लग्नासाठी टाळाटाळ करत असल्याच्या रागातून प्रियकराने भररस्त्यात प्रेयसीची हत्या केल्याची घटना काळाचौकी येथे रविवारी घडली.

मुंबई : ११ वर्षांपासून असलेल्या प्रेमसंबंधांनंतर लग्नासाठी टाळाटाळ करत असल्याच्या रागातून प्रियकराने भररस्त्यात प्रेयसीची हत्या केल्याची घटना काळाचौकी येथे रविवारी घडली. प्रसाद सावंत (२७) असे आरोपीचे नाव असून हत्येनंतर तो काळाचौकी पोलिसांच्या स्वाधीन झाला.
लालबाग परिसरातील देनू कंपाऊंड येथे सावंत राहण्यास असून तो इव्हेंट मॅनेजमेंटचे काम करतो. त्याच परिसरात राहणारी एकता तळवलकर (२५) सोबत गेल्या ११ वर्षांपासून त्याचे प्रेमसंबंध होते. या प्रेमसंबंधाला एकताच्या घरच्यांनी नकार दिला होता. कुटुंबियांच्या विरोधात जाऊन लग्न करण्यासाठी सावंत एकताला जबरदस्ती करत होता. रविवारी दारुच्या नशेत सावंतने एकताला काळाचौकी येथील जीडी आंबेडकर रोडकडे बोलावून घेतले. तेथे लग्नावरून दोघांमध्ये पुन्हा वाद झाले. याच रागातून सायंकाळी सव्वा सातच्या सुमारास सावंतने भररस्त्यात सोबत आणलेल्या चाकूने एकताच्या गळ्यावर वार केले. रक्ताच्या थारोळ्यात पडलेल्या एकताला तेथेच सोडून सावंत काळाचौकी पोलीस ठाण्यात हजर झाला.
सावंतकडून एकताच्या हत्येची माहिती पोलिसांना मिळताच त्यांनी तत्काळ घटनास्थळी धाव घेतली. एकताला जवळच्या केईएम रुग्णालयात दाखल करण्यात आले. मात्र दाखल करण्यापूर्वीच
तेथील डॉक्टरांनी एकताला मृत घोषित केले. (प्रतिनिधी)