मुंबईत हत्येचे सत्र सुरूच

अंधेरीत विवाहितेची हत्या : सहा दिवसांत सहा हत्येच्या घटना

लोकमत न्यूज नेटवर्क

मुंबई : वरळीतील ७७ वर्षीय वृद्धेच्या हत्या प्रकरणाने खळबळ उडाली असताना, शनिवारी अंधेरीत विवाहितेच्या हत्येची घटना समोर आली. मुंबईत हत्या सत्र सुरू असून, गेल्या सहा दिवसांत सहा हत्येच्या घटनांची नोंद मुंबई पोलीस दफ्तरी करण्यात आली आहे.

मुंबईत गेल्या महिनाभरात १२ हत्येच्या घटना घडल्या आहेत. अशात फेब्रुवारी महिन्यातही दिवसाआड हत्या, हत्येचा प्रयत्न अशा घटना डोकेवर काढताना दिसत आहेत. यात, वरळीत व्यावसायिक कुटुंबीय बंगल्यातील वरच्या मजल्यावर असताना, तळ मजल्यावर झोपलेल्या वृद्ध महिलेचे हात पाय बांधून लुटीच्या उद्देशाने गुरुवारी तिची हत्या करण्यात आली. याप्रकरणी वरळी पोलीस अधिक तपास करत आहे. तसेच गुन्हे शाखाही याचा समांतर तपास करत आहे. यात, केअरटेकर महिलेच्या संगनमताने ही हत्या केल्याचा संशय पोलिसांकडून वर्तविण्यात येत आहे. ही महिला दोन ते अडीच महिन्यांपासून येथे काम करत आहे. ती गावी गेल्यानंतर ही घटना घडल्यामुळे पोलीस तिचाही शोध घेत आहे. दरम्यान, शनिवारी अंधेरीत चारित्र्याच्या संशयातून पतीनेच पत्नीची हत्या केली. एमआयडीसी पोलिसांनी आरोपी पतीला अटक केली आहे.

.....

घटना...

२१ फेब्रुवारी : रात्री ११च्या सुमारास कफपरेड येथील धोबी घाट परिसरात राहणाऱ्या रेणुका विठ्ठल राठोड (१९) या विवाहितेची गळा आवळून हत्या करण्यात आली. याप्रकरणी रेणुकाची आई सोनीबाई चव्हाण यांनी दिलेल्या तक्रारीवरून कफपरेड पोलिसांनी तिच्या पतीविरुद्ध हत्येचा गुन्हा नोंदवत तपास सुरू केला आहे.

..

२३ फेब्रुवारी : पवई येथील तुंगा गाव परिसरात राजेश हरिकिरण भारद्वाज (४०) याची हत्या करण्यात आली आहे. हत्येचे कारण अद्याप अस्पष्ट असून, पवई पोलीस अधिक तपास करत आहेत.

....

२४ फेब्रुवारी : गोरेगाव लिंकरोड परिसरात सुरेश उर्फ सुऱ्या मसूद (३८) यांच्या डोक्यावर हातोड्याने वार करून त्यांची हत्या केली. याप्रकरणी बांगूरनगर पोलिसांनी तीन आरोपींविरुद्ध हत्येचा गुन्हा नोंदवला आहे.

...

२५ फेब्रुवारी : ससूनडाॅक येथे सकाळी साडेसातच्या सुमारास दोन मच्छीमारांमध्ये शाब्दिक बाचाबाचीचे रूपांतर हाणामारीत झाले. यात, इस्माईल उर्फ युसूफ शेख (५१) यांची हत्या झाली आहे. घटनेचे सीसीटीव्ही फुटेज पोलिसांच्या हाती लागले असून, याप्रकरणी कुलाबा पोलीस अधिक तपास करत आहे.

....

२५ फेब्रुवारी : वरळी सी फेस परिसरात असलेल्या बंगल्यात राहणाऱ्या ७७ वर्षीय विश्वी डोलवानी यांची लुटीच्या उद्देशाने रात्री दहा ते सव्वाबाराच्या सुमारास हत्या करण्यात आली आहे. याप्रकरणी वरळी पोलीस अधिक तपास करत आहेत.

....

२६ फेब्रुवारी : पहाटे साडेचारच्या सुमारास अंधेरी पूर्वेकडील जिजामातारोड परिसरात राहणाऱ्या कविता चौधरी या विवाहितेची पतीनेच गळा दाबून हत्या केली आहे. चारित्र्याच्या संशयातून ही हत्या करण्यात आली असून, एमआयडीसी पोलिसांनी हत्येचा गुन्हा नोंदवत पतीला अटक करण्यात आली आहे.

...