आईसोबत असलेल्या प्रेमसंबंधाच्या रागातून तरुणाची हत्या

धारावीतील घटना : अवघ्या पाच तासांत गुन्ह्याची उकल

लोकमत न्यूज नेटवर्क

मुंबई : आईसोबत असलेल्या प्रेमसंबंधाच्या रागातून तरुणाची हत्या करण्यात आल्याची घटना धारावीत घडली. धारावी पोलिसांनी अवघ्या पाच तासांत गुन्ह्याची उकल करत दीपक उर्फ साई खरटमोल याला अटक केली.

धारावी परिसरात राहणाऱ्या सचिन कुंचिकर्वे या तरुणाची सोमवारी पहाटे साडेतीनच्या सुमारास धारदार शस्त्राने वार करत हत्या करण्यात आली. स्थानिकांच्या मदतीने सचिनला रुग्णालयात नेले असता, तेथे दाखल करण्यापूर्वी त्याला मृत घोषित करण्यात आले आहे. या प्रकरणी धारावी पोलिसांनी हत्येचा गुन्हा नोंदवत तपास सुरू केला. तपासाअंती दीपकला धारावीतून अटक करण्यात आली. सचिनचे दीपकच्या आईसोबत प्रेमसंबंध असल्याचा संशय होता. यातूनच त्याने हत्या केल्याची कबुली पोलिसांना दिली. त्यानुसार, पोलीस अधिक तपास करत आहेत.

............................