नीट-पीजी, २०२४ चार महिन्यांनी पुढे ढकलली; ३ मार्चऐवजी आता ७ जुलैला होणार

आधी जाहीर केलेल्या तारखेत बदल

मुंबई : 'नॅशनल बोर्ड ऑफ एक्झामिनेशन इन मेडिकल सायन्सेस'ने (एनबीईएमएस) ३ मार्चला अपेक्षित असलेली नीट-पीजी, २०२४ ही परीक्षा चार महिन्यांनी पुढे ढकलली आहे. सुधारित वेळापत्रकानुसार ही परीक्षा आता ७ जुलैला होणार आहे. 

बोर्डाने अधिसूचना काढत ऑगस्ट, २०२४ची  अपेक्षित कट-ऑफ तारीख देखील नमूद केली आहे. बोर्डाच्या अधिकृत अधिसूचनेनुसार १५ ऑगस्टला या परीक्षेची कटऑफ लागेल. 

नीट-पीजी ही वैद्यकीयच्या पदव्युत्तर अभासक्रमांच्या प्रवेशासाठी घेण्यात येते. या परीक्षेची पुनर्नियोजित तारीख ३ मार्च, २०२४ होती. परंतु नॅशनल मेडिकल कमिशनच्या सूचनेवरून परीक्षा पुढे ढकलण्यात आली आहे. 

परीक्षा देणार्‍या उमेदवारांना अधिक माहितीसाठी एनबीईएमएसची अधिकृत वेबसाइट नियमितपणे तपासण्याचा सल्ला देण्यात आला आहे.