नेरूळमध्ये कारटेप चोरांचा धुमाकूळ

नेरूळमध्ये कारटेप चोरांनी धुमाकूळ घातला आहे. शुक्रवारी पहाटे जवळपास पाच कारमधील टेप चोरीला गेले आहेत. नागरिकांनी तीव्र नाराजी व्यक्त केली आहे.

नवी मुंबई : नेरूळमध्ये कारटेप चोरांनी धुमाकूळ घातला आहे. शुक्रवारी पहाटे जवळपास पाच कारमधील टेप चोरीला गेले आहेत. नागरिकांनी तीव्र नाराजी व्यक्त केली आहे. 

नेरूळ गावातील बांचोली मैदानाजवळ उभी असलेली स्विफ्ट व इनोव्हा कारमधील कारटेपची चोरी झाली आहे. चोरटय़ांनी पहाटे 5 वाजून 4क् मिनिटांच्या दरम्यान कारच्या काचा तोडून आतमधील टेप पळवून नेले आहेत. सकाळी सदर प्रकार निदर्शनास आल्यानंतर कार मालक व मनसेचे विभाग अध्यक्ष सविनय म्हात्रे यांनी नेरूळ पोलीस स्टेशनमध्ये तक्रार दिली आहे. नेरूळ सेक्टर 2 मध्येही अशाचप्रकारे कारची काच तोडून टेप चोरी झाल्याची तक्रार करण्यासाठी एक जण आला असल्याचे निदर्शनास आले आहे. दारावे गावामध्येही चोरटय़ांनी कार टेपची चोरी केली आहे. नेरूळ परिसरामध्ये एकाच दिवशी जवळपास 5 ठिकाणी कारटेप चोरीच्या घटना घडल्या आहेत. यामुळे वाहन धारकांमध्ये भीतीचे वातावरण निर्माण झाले आहे. चोरीच्या घटना थांबविण्यासाठी पोलिसांची गस्त वाढविण्याची मागणी केली जात आहे. (प्रतिनिधी) 

 

चोरटे सीसीटीव्हीमध्ये

नेरूळमध्ये कारची काच तोडून टेपची चोरी करत असतानाचे दृश्य सीसीटीव्हीमध्ये आले आहे. सदर चित्रीकरण पोलिसांकडे देण्यात आले आहे. एकाचा चेहरा यामध्ये दिसत असून त्या आधारे पोलीस चोरटय़ांचा शोध घेत आहेत.