मुख्यमंत्र्यांकडून शिवसेनेच्या नवीन नियुक्त्या जाहीर

पावसकर, मोरे यांची सचिवपदी नियुक्ती

लोकमत न्यूज नेटवर्क
मुंबई : मुख्यमंत्री एकनाथ शिंदे यांच्याकडून शिवसेनेच्या नवीन पदाधिकाऱ्यांची नियुक्ती जाहीर करण्यात आली आहे. मुख्यमंत्री एकनाथ शिंदे यांच्याहस्ते ही नियुक्तीपत्रे आज प्रदान करण्यात आली.

शिवसेनेच्या सचिवपदी कामगार नेते किरण पावसकर यांची नियुक्ती करण्यात आलेली आहे, तर ठाण्याचे माजी महापौर संजय मोरे यांची शिंदे यांनी सचिव पदावर नियुक्ती केली आहे, तर आधी जाहीर करण्यात आल्याप्रमाणे आमदार दीपक केसरकर हेच पक्षाच्या मुख्य प्रवक्तेपदी कायम राहणार आहेत. याशिवाय शिवसेना उपनेते गुलाबराव पाटील, शिवसेना उपनेते आणि आमदार उदय सामंत, किरण पावसकर, आमदार गुलाबराव पाटील आणि दहिसरच्या माजी नगरसेविका शीतल म्हात्रे यांची प्रवक्तेपदी निवड करण्यात आली आहे, तर अंबरनाथचे आमदार डॉ. बालाजी किणीकर यांची पक्षाच्या खजिनदारपदी नियुक्ती करण्यात आली आहे.
 मुख्यमंत्री एकनाथ शिंदे यांच्याहस्ते ही नियुक्तीपत्रे किरण पावसकर आणि संजय मोरे यांना देण्यात आली, तर बाकी शिलेदरांना देखील ती लवकरच देण्यात येतील. या नियुक्त्यांमुळे पक्षाचे काम अधिक जोमाने करता येणे शक्य होणार असून, पक्ष विस्तारासाठी देखील हा निर्णय फायदेशीर ठरणार आहे.