आदित्य ठाकरे यांच्या निधीतून बदलला चेहरा मोहरा
मनोहर कुंभेजकर
मुंबई : पश्चिम उपनगरातील शेवटचे टोक दहिसर असून, येथील दहिसरची नदी हे दहिसरकरांचे वैभव आहे. दहिसर नदीच्या संरक्षक भिंतीला आणि परिसराला आता न्यू लूक आला आहे. राज्याचे पर्यावरणमंत्री आणि उपनगराचे पालकमंत्री आदित्य ठाकरे यांच्या निधीतून दहिसर नदीचा बदलला चेहरा मोहरा बदलला आहे.
दहिसर नदीवरील दुतर्फा भिंतीवरील सामाजिक संदेश व वन्यजीवांच्या भित्तिचित्रांनी केलेले सुशोभिकरण, दहिसर नदीच्या संरक्षक भिंतीवर आकर्षक विद्युत रोषणाई तसेच रंगीबेरंगी छत्र्यांच्या सुशोभित सेल्फी पॉइंट यामुळे दहिसरच्या वैभवात भर पडली आहे.
तरुणांमध्ये सेल्फी काढण्यासाठी उत्सुकता असून, तरुणांची येथे गर्दी होत असल्याचे चित्र आहे.
उपनगरचे पालकमंत्री आदित्य ठाकरे यांच्या वाढदिवसाचे औचित्य साधून तसेच त्यांच्या निधीतून आणि संकल्पनेतून ही आकर्षक कलाकृती साकारली आहे. शिवसेनेच्या प्रवक्त्या आणि प्रभाग क्रमांक ७च्या स्थानिक नगरसेविका शीतल म्हात्रे यांनी यासाठी पुढाकार घेतला.
दहिसरकर हे शनिवार व रविवारी शिवाजी पार्क, जुहू चौपाटी मरिन लाइन्सच्या क्विन्स नेकलेसला जाऊ शकत नाही. मात्र याठिकाणी असलेले रंगीबेरंगी दिवे आणि रंगीबेरंगी छत्र्यांच्या सुशोभित सेल्फी पॉइंटमुळे या परिसराला जणू क्विन्स नेकलेसचे स्वरूप आल्याची माहिती शीतल म्हात्रे यांनी ‘लोकमत’ला दिली. तसेच पर्यावरणाचे रक्षण करा, जलप्रदूषण रोखा असे सामाजिक संदेशही येथील संरक्षक भिंतीवर सुशोभिकरणातून सादर केले आहेत. दहिसर गाव म्हणून दहिसरची पुरातन ओळख आहे. मात्र या सुशोभिकरणाच्या माध्यमातून दहिसरचे गावपण जपण्याचा प्रयत्न केल्याची माहिती त्यांनी दिली.
या कामाचे उद्घाटन शिवसेना सचिव सुरज चव्हाण यांच्या हस्ते रविवारी सायंकाळी झाले. आपल्या भाषणात त्यांनी शीतल म्हात्रे यांच्या कल्पकतेचे कौतुक करून सतत नावीन्याचा ध्यास घेत त्या एक प्रोग्रेसिव्ह नगरसेविका या प्रभागाला लाभल्या असल्याचे गौरवोद्गार काढले. आमदार व विभागप्रमुख विलास पोतनीस व शीतल म्हात्रे यांच्या सूचना अंमलात आणण्यासाठी दहिसरमध्ये आगरी कोळी भवन बांधण्यासंदर्भात उपनगरमंत्री आदित्य ठाकरे यांच्यासमवेत लवकरच बैठक आयोजित केली जाईल अशी माहिती सूरज चव्हाण यांनी दिली.
याप्रसंगी विभागप्रमुख व आमदार विलास पोतनीस आणि महिला विभाग संघटक सुजाता शिंगाडे, नगरसेविका शीतल म्हात्रे, उपविभागप्रमुख भालचंद्र म्हात्रे, उपविभागप्रमुख विनायक सामंत, अविनाश लाड तसेच इतर शिवसेना-युवासेना पदाधिकारी आणि कार्यकर्ते उपस्थित होते. या प्रसंगी युवा सेनेच्या वतीने ‘रायजिंग स्टार’ या गरजू खेळाडूंच्या संस्थेला आवश्यक वस्तूंचे किट भेट देण्यात आले.
------------------------------