लोकमत न्यूज नेटवर्क
मुंबई : ठाणे शहर पोलीस दलातून पुन्हा मुंबईत बदली झालेल्या एका पोलीस निरीक्षकाच्या नियुक्तीबरोबरच मुंबई पोलीस दलात कार्यरत असलेल्या दोन पोलीस निरीक्षकांसह पाच सहायक पोलीस निरीक्षक आणि १० उपनिरीक्षकांच्या बदल्या करण्यात आल्या आहेत.
यात, ठाण्यातून मुंबईत बदली झालेले पोलीस निरीक्षक रवीदत्त सावंत यांची मुलुंड पोलीस ठाण्यात नियुक्ती करण्यात आली आहे. तसेच जोगेश्वरी पोलीस ठाण्यातील पोलीस निरीक्षक दिनकर राऊत यांची साकीनाका पोलीस ठाण्यात तर, वर्सोवा पोलीस ठाण्यातील पोलीस निरीक्षक संजय पवार यांची जुहू पोलीस ठाण्यात बदली करण्यात आली आहे. अधिकाऱ्यांच्या बदल्यांसोबतच पाच महिला पोलीस अंमलदारांच्या ओशीवरा, तर चार महिला पोलीस अंमलदारांच्या जुहू पोलीस ठाण्यात बदल्या करण्यात आल्या आहेत.