मुंबईत नाइट कर्फ्यूला मुदतवाढ नाही

लोकमत न्यूज नेटवर्क

मुंबई : नाइट कर्फ्यूचा कालावधी वाढविण्यासंदर्भात राज्य सरकारकडून बुधवारी कुठलीही सूचना न आल्याने, मुंबई पोलिसांनी मुंबईतील नाइट कर्फ्यू न वाढविण्याचा निर्णय घेतला आहे. याला मुंबई पोलीस प्रवक्ते चैतन्या एस यांनी दुजोरा दिला आहे.

ब्रिटनमध्ये कोरोना व्हायरसचा नवा प्रकार आढळून आल्याने ख्रिसमस व नववर्षाच्या पार्श्वभूमीवर होणारी गर्दी लक्षात घेत, २१ डिसेंबर रोजी मुख्यमंत्री उद्धव ठाकरे यांनी खबरदारीच्या उपाययोजनांसाठी महानगरपालिका क्षेत्रात नाइट कर्फ्यू लागू केला. त्यानुसार, रात्री ११ वाजेपासून सकाळी ६ वाजेपर्यंत मुंबईत नाइट कर्फ्यू होता. या कर्फ्यूची ५ जानेवारीपर्यंत मुदत होती. पण, नाइट कर्फ्यूची मुदत संपली असताना, हा कर्फ्यू वाढविण्याबाबत राज्य सरकारकडून बुधवारी कुठलीही सूचना न आल्याने, मुंबई पोलिसांनी मुंबईतील नाइट कर्फ्यू न वाढविण्याचा निर्णय घेतला आहे.