लोकमत न्यूज नेटवर्क
मुंबई, मुंबई उपनगरच्या जिल्हा कौशल्य विकास, रोजगार व उद्योजकता मार्गदर्शन केंद्र आणि जिल्हा व्यवसाय शिक्षण व प्रशिक्षण कार्यालय यांच्यातर्फे दिनांक १७ ते २१ मे २०२१ या दरम्यान ऑनलाईन पंडित दिनदयाळ उपाध्याय रोजगार मेळाव्याचे आयोजन करण्यात आले आहे. या मेळाव्यात रोजगार देणाऱ्या विविध नामांकित कंपन्या व नियोक्त्यांकडून रिक्तपदे www.rojgar.mahaswayam.gov.in या वेबपोर्टलवर ऑनलाईन अधिसूचित करण्यात येणार आहेत.
वेबपोर्टलवर नोंदणी केलेल्या आणि रिक्त पदांसाठी पात्रतेप्रमाणे मॅचिंग होणाऱ्या किंवा ऑनलाईन अर्ज केलेल्या उमेदवारांच्या व्हिडीओ कॉन्फरन्सद्वारे मुलाखती घेण्यात येणार आहेत. या संधीचा लाभ घेण्यासाठी वेबपोर्टलला लॉग-इन करावे. रोजगार इच्छुक उमेदवारांनी अद्यापपर्यंत सेवायोजन नोंदणी केली नसल्यास संकेतस्थळावर किंवा ॲण्ड्राॅईड मोबाईलधारकांनी प्ले स्टोअरमधून ‘महास्वयंम ॲप’ मोफत डाऊनलोड करुन नोंदणी करावी. तसेच लॉग-इन करुन शैक्षणिक पात्रतेनुसार उपलब्ध रिक्त पदांसाठी अर्ज करावा, असे आवाहन करण्यात आले आहे.