मुंबई : कामावरुन रात्री नऊनंतर घरी परतणारे मध्य रेल्वेवरील प्रवासी शुक्रचारी चांगलेच लटकले. चिंचपोकळी स्थानकाजवळ एका लोकलचा बॅटरी बॉक्स रुळावर पडल्याने लोकलमध्ये तांत्रिक समस्या उद्भवली. त्यामुळे डाऊनला जाणाऱ्या धीम्या लोकल या जलद मार्गावर वळवण्यात आल्या. सीएसटी - ठाणे लोकल चिंचपोकळी स्थानकाजवळ रात्री नऊच्या सुमारास येताच या लोकलचा एक बॅटरी बॉक्स रुळावर पडल्याने लोकल जागीच थांबली. त्यामुळे मागील लोकलही जागेवरच थांबल्या. सीएसटीपासून दादर स्थानकापर्यंत धीम्या मार्गावरील प्लॅटफॉर्मवर तर प्रचंड गर्दी उसळली. कामावरुन घरी परतणाऱ्या चाकरमान्यांचे यामुळे खूपच हाल झाले. हा बॉक्स खूपच जड असल्याने तो ट्रॅकवरुन हटविल्याशिवाय भायखळा ते परेल दरम्यान ठाणे, कल्याणच्या दिशेने जाणाऱ्या धीम्या लोकल सुरु करणे कठीण होते. त्यामुळे भायखळा ते परेल दरम्यान डाऊन धीम्या मार्गावरील लोकल या जलद मार्गावर वळवण्यात आल्या. चिंचपोकळी, करी रोड आणि परेल स्थानकात धीम्या लोकल उपलब्ध होत नसल्याने या स्थानकात लोकल पकडण्यासाठी आलेल्या प्रवाशांचे मात्र हाल झाले. रात्री साडेदहा वाजता रुळावर पडलेला बॅटरी बॉक्स हटविण्यात आला आणि लोकल पुन्हा धीम्या मार्गावर वळवण्यात आल्या. त्यामुळे रेल्वे रात्री उशिरापर्यंत विस्कळीतच होती. बॅटरी बॉक्स पडलेली लोकल ही पुढे यार्डात नेण्यात आली.
मध्य रेल्वेचे प्रवासी लटकले
By admin | Published: October 31, 2015 12:44 AM