सुशांतसिंह राजपूतच्या जीवनावरील चित्रपटाचे प्रदर्शन करण्यास स्थगिती द्या

उच्च न्यायालयात याचिका

लोकमत न्यूज नेटवर्क

मुंबई : दिवंगत बॉलिवूड अभिनेता सुशांतसिंह राजपूतच्या जीवनावर आधारित चित्रपट ‘न्याय : द जस्टिस’ प्रदर्शित करण्यास स्थगिती द्यावी, अशी विनंती करणारी याचिका उच्च न्यायालयात दाखल करण्यात आली आहे.

या चित्रपटावर कायमस्वरूपी बंदी आणावी, यासाठी मनीष मिश्रा यांनी दिंडोशी न्यायालयात अर्ज केला. मात्र, दिंडोशी न्यायालयाने तिला अंतरिम दिलासा देण्यास नकार दिला. त्याविरोधात मिश्रा यांनी उच्च न्यायालयात अपिल दाखल केले. उच्च न्यायालयाने या याचिकेवर तत्काळ सुनावणी घेण्याची आवश्यकता नाही, असे म्हणत या याचिकेवर मार्चमध्ये सुनावणी ठेवली.

मिश्रा यांच्या म्हणण्यानुसार, या चित्रपटाचे निर्माते सरला सरोगी विद्यमान सरकारची प्रतिमा खराब करण्याचा प्रयत्न करत आहे. सुशांतच्या आत्महत्येचा तपास करण्यास राज्य सरकार कसे अपयशी ठरले, हे दाखवण्याचा प्रयत्न या चित्रपटात करण्यात आला आहे.

आपण सुशांतसिंह राजपूत व सध्या सत्तेत असलेल्या सरकारशी भावनिकरित्या जोडलेलो आहोत, असा दावा मिश्रा यांनी केला आहे. मिश्रा यांच्या या याचिकेवर सरोगी यांनी आक्षेप घेतला आहे. मनिष यांना ही याचिका दाखल करण्याचा अधिकार नाही. तसेच त्यांनी ही याचिका वेळेआधी दाखल केली आहे. कारण अद्याप चित्रपट प्रदर्शित केलेला नाही, असे सरोगी यांच्या वकिलांनी न्यायालयाला सांगितले.

उच्च न्यायालयाने या याचिकेवरील सुनावणी तातडीने घेण्याची आवश्यकता नसल्याचे म्हणत या याचिकेवरील सुनावणी मार्च महिन्याच्या पहिल्या आठवड्यात ठेवली आहे.

........................