मुंबईतील मालमत्तांची किंमत राज्यापेक्षा पाच पटीने जास्त

Property prices in Mumbai : मुंबईत १ कोटी ३४ लाख रुपये

राज्यातील सरासरी किंमत ३८ लाख रुपये

मुंबई : मुद्रांक शुल्कातील कपात आणि विकासकांच्या सवलतींमुळे मुंबईच नव्हे तर राज्यातील मालमत्तांचे खरेदी विक्री व्यवहार सध्या तेजीत आहे. मुंबईत गेल्या वर्षीच्या तुलनेत ६० टक्के जास्त व्यवहार होत असतानाच राज्यातील वृध्दीचा आकडा हा जवळपास ३५ टक्के आहे. विशेष म्हणजे मुंबईतील मालमत्तांची सरासरी किंमत १ कोटी ६९ लाख रुपये असून महाराष्ट्रात ती किंमत जवळपास ३८ लाख रुपयांच्या आसपास असल्याची माहिती हाती आली आहे.

राज्य सरकारने मुद्रांक शुल्कात कपात केल्यानंतर राज्यात (मुंबई वगळता) सप्टेंबर ते नोव्हेंबर या तीन महिन्यांत अनुक्रमे १ लाख १९ हजार, १ लाख ३० हजार आणि १ लाख ३७ हजार मालमत्तांची नोंदणी झाली आहे. विशेष म्हणजे डिसेंबर महिन्यांतील पहिल्या १५ दिवसांतच ९७ हजार मालमत्तांची नोंदणी झाली आहे. पुढील पंधरा दिवसांत ती संख्या १ लाख ७५ हजारांच्या  पुढे जाण्याची शक्यता आहे. आजवर एका महिन्यांत झालेले हे सर्वाधिक व्यवहार ठरण्याची चिन्हे आहेत. राज्य सरकारने मुद्रांक शुल्कात तीन टक्के कपात केल्यामुळे सरकारी तिजोरीत अनुक्रमे ७७३, ९३१, १०२६ आणि ७४१ कोटी रुपये जमा झाले आहेत. या आकडेवारीनुसार राज्यातील मालमत्तांची सरासरी किंमत काढल्यास ती ३८ लाख रुपये होते.

मुंबई शहरांतही गेल्या ९ वर्षांतील सर्वाधिक घरांच्या खरेदी विक्रीचे व्यवहार नोव्हेंबर महिन्यांत झाले आहेत. या घरांच्या खरेदी विक्रीतून नोव्हेंबर महिन्यांत २८८ कोटी रुपये जमा झाले होते. त्याचा ताळेबंद मांडल्यास मुंबईतील मालमत्तांची सरासरी किंमत १ कोटी ६९ लाख रुपये होते. मुंबईतील मालमत्तांच्या किंमती गगनाला भिडणा-या असल्याचे त्यातून निष्पन्न होत आहे.