भरधाव वेगामुळे रिक्षाचालकाचा बळी

मुंबई : भरधाव वेगाने जात असलेल्या रिक्षाचा अपघात होऊन रिक्षाचालकाचा मृत्यू झाल्याची घटना छेडानगर परिसरात घडली. या प्रकरणी मृत चालक ईर्शाद खान (५०) याच्याविरोधात टिळकनगर पोलीस ठाण्यात गुन्हा दाखल करण्यात आला आहे. ते गोवंडीतील रहिवासी होते.

...........................................

चेंबूरमध्ये पूर्ववैमनस्यातून हत्येचा प्रयत्न

मुंबई : पूर्ववैमनस्यातून २५ मे रोजी रात्री १० वाजता चेंबूरमध्ये सिद्धांत कहार (२२) या तरुणावर दगडाने प्राणघातक हल्ला चढविण्यात आला. स्थानिकांच्या मदतीने त्याला जवळच्या सरकारी रुग्णालयात दाखल करण्यात आले. या प्रकरणी आरसीएफ पोलिसांनी हत्येचा प्रयत्न केल्याप्रकरणी गुन्हा नोंदविला आहे.

............................................

बॅंकेतील रकमेवर ऑनलाइन डल्ला

मुंबई : क्रेडिट कार्डची गोपनीय माहिती चोरी करून ठगाने चेंबूरमधील एका व्यापाऱ्याच्या बॅंक खात्यातील रकमेवर ऑनलाइन डल्ला मारल्याचा प्रकार समोर आला आहे. या फसवणूकप्रकरणी गुन्हा दाखल करून टिळकनगर पोलीस अधिक तपास करत आहेत.

.......................................................