Girish Bapat : भाजपचा ज्येष्ठ लढवय्या नेता हरपला, गिरीश बापट यांच्या जाण्याने व्यथित झालोय: सुधीर मुनगंटीवार

पुण्याचे खासदार गिरीश बापट (Girish Bapat) यांचे आज पुण्यात दुखःद निधन झाले. ते महाराष्ट्रातील भाजपच्या जेष्ठ नेत्यांपैकी एक होते. आज त्यांना मंत्री सुधीर मुनगंटीवावर यांनी  श्रद्धांजली वाहिली. 'पुण्याचे भाजप खासदार आणि विधिमंडळातील माझे सहकारी मित्र गिरीश बापट यांच्या निधनाचे वृत्त वेदनादायी आहे. १९७३ पासून राजकारणात सक्रिय असलेल्या गिरीश बापट यांनी पुण्यासह महाराष्ट्रात भाजपच्या यशस्वी वाटचालीत मोठे योगदान दिले, असंही सुधीर मुनगंटीवार म्हणाले. 

'टेल्को कंपनीत १९७३ मध्ये काम करत असताना कामगार संघटनेच्या माध्यमातून राजकारणात प्रवेश करणाऱ्या बापट यांनी नगरसेवक, आमदार, राज्यातील मंत्रिमंडळात मंत्री म्हणून काम केले. १९९५ पासून कसबा पेठ मतदारसंघात सलग पाचवेळा आमदार असलेल्या बापट यांनी पुण्याचा कायापालट करण्यासाठी प्रयत्नांची पराकाष्ठा केली. 

Girish Bapat :पुण्यातील भाजपचा आधारस्तंभ हरपला; भाजपचे ज्येष्ठ नेते खासदार गिरीश बापट यांचे निधन

राज्याच्या मंत्रिमंडळात अनेक खात्यांचे मंत्री आणि पुण्याचे पालकमंत्री म्हणून बापट यांनी भरीव कामगिरी केली. २०१९ पासून पुण्याचे खासदार म्हणून विक्रमी मताधिक्याने ते निवडून आले. तेव्हापासून पुण्याच्या विकासाला त्यांनी अधिक वेग दिला. परंतु गेल्या काही दिवसांपासून ते आजारी होते. त्यांच्या वर पुण्यात उपचारही सुरू होते. वयाच्या ७३ व्या वर्षी त्यांची प्राणज्योत मालवली. गेल्या दीड वर्षांपासून आजाराशी सुरू असलेली त्यांची झुंज अपयशी ठरली. बापट यांच्या जाण्याचे मोठी पोकळी निर्माण झाली आहे, जी कधीही भरून न निघणारी आहे. ईश्वर त्यांच्या आत्म्यास सद्गतीप्रदान करो अशा शब्दात मंत्री सुधीर मुनगटीवार यांनी शोक संवेदना व्यक्त केल्या.