माझ्यावर डॉक्टरांनीच उपचार केले, कंपाऊंडर विधानावरुन संजय राऊतांचा यु टर्न

एका वृत्तवाहिनीला दिलेल्या मुलाखतीत संजय राऊत यांनी डॉक्टरांपेक्षा मी कंपाऊंडरकडून औषधं घेतो, असं म्हटलं होतं. ‘डॉक्टरपेक्षा कंपाउंडरला जास्त कळतं, ‘मी तर नेहमी कंपाउंडरकडून औषध घेतो.

ठळक मुद्देखासदार संजय राऊत यांनी आपल्या वक्तव्यावरुन यु टर्न घेतल्याचं दिसून आलं. टीव्ही9 मराठीशी बोलताना संजय राऊत यांनी माझ्यावर डॉक्टरांनीच उपचार केले आहेत, असे म्हटलंय. 

मुंबई - डॉक्टरांबद्दल अत्यंत अवमानजनक वक्तव्य केल्याबद्दल शिवसेनेचे खासदार संजय राऊत यांनी समस्त डॉक्टरवर्गाची माफी मागावी, अशी मागणी इंडियन मेडिकल असोसिएशनच्या (आयएमए) महाराष्ट्र शाखेने केली आहे. आयएमए कार्यकारिणीच्या रविवारी झालेल्या बैठकीत राऊत याच्याबाबतच्या मागणीचा तसेच राऊत यांच्या निषेधाचा ठराव एकमताने मंजूर करण्यात आला. त्यानंतर, खासदार संजय राऊत यांनी आपल्या वक्तव्यावरुन यु टर्न घेतल्याचं दिसून आलं. टीव्ही9 मराठीशी बोलताना संजय राऊत यांनी माझ्यावर डॉक्टरांनीच उपचार केले आहेत, असे म्हटलंय. 

एबीपी माझा या वृत्तवाहिनीला दिलेल्या मुलाखतीत संजय राऊत यांनी डॉक्टरांपेक्षा मी कंपाऊंडरकडून औषधं घेतो, असं म्हटलं होतं. ‘डॉक्टरपेक्षा कंपाउंडरला जास्त कळतं, ‘मी तर नेहमी कंपाउंडरकडून औषध घेतो. डब्ल्यूएचओला काय कळतं, सीबीआयसारखंच आहे ते, इकडून तिकडून माणसं गोळा केलेली असतात, डब्ल्यूएचओच्या नादाला लागले म्हणून जास्त कोरोना वाढला,’ अशी विधाने राऊत यांनी त्या मुलाखतीत केली होती. त्यानंतर, राज्यातील डॉक्टर वर्गात मोठी नाराजी पसरली. राऊत यांच्या वक्तव्यानंतर आयएमएने नाराजी व्यक्त करत त्यांनी डॉक्टरांची माफी मागावी, अशी मागणी केली आहे. 

राज्यातील डॉक्टरांचा नाराजीचा सूर लक्षात येताच, संजय राऊत यांनी आपल्या विधानावरुन यु टर्न घेतला आहे.  मी WHO बद्दल बोललो, याचा अर्थ इथल्या डॉक्टरांचा अपमान केला असं नाही, मी नेहमीच डॉक्टरांचा सन्मान केला आहे. मी WHO बद्दल बोललो, मीच काय, ट्रम्प, रशिया किंवा अन्य देशांनीही WHO वर बोट ठेवलं आहे, असे म्हणत संजय राऊत यांनी आपल्या वक्तव्याचा मतितार्थ पटवून देण्याचा प्रयत्न केलाय. खासगी वृत्तवाहिनीशी बोलताना राऊत यांनी हे स्पष्टीकरण दिलंय. 

दरम्यान, आयएमएच्या महाराष्ट्र शाखेचे अध्यक्ष डॉ. अविनाश भोंडवे यांनी लोकमतशी बोलताना म्हटले की, कोरोनाच्या संकटाचा मुकाबला करण्यासाठी डॉक्टर आज प्राणाची बाजी लावून काम करताहेत. अशा वेळी त्यांचे कौतुक करणे तर सोडाच, पण राऊत यांनी डॉक्टरांपेक्षा कंपाउंडरना जास्त कळते, असे म्हणणे निषेधार्ह आहे. डब्ल्यूएचओवरही त्यांनी केलेली टीका अत्यंत अनाठायी आहे. राऊत यांनी देशभरातील डॉक्टरांच्या भावना दुखावल्या आहेत. त्यांनी डॉक्टरांची माफी मागावी अशी आमची मागणी आहे. त्यांच्याविरुद्ध पोलिसात तक्रार करण्याबाबत आम्ही विचार करीत आहोत. आयएमएच्या राज्यभरातील २१६ शाखांतर्फे राऊत यांच्या निषेधाचे ठराव मंजूर करून ते राज्यपाल, मुख्यमंत्री आणि राज्यसभा सचिवालयाकडे पाठविण्यात येणार असल्याचेही डॉ. भोंडवे यांनी म्हटले होते. 
 

Read in English