‘त्या’ स्वयंपाक्याच्या कुटुंबीयांचा शोध सुरू

मालवणी दुर्घटना : पोलिसांकडून सीडीआरची तपासणी

लोकमत न्यूज नेटवर्क

मुंबई : मालवणीत चार मजली घर कोसळून झालेल्या अपघातात बाराजणांना जीव गमवावा लागला. यातील ११ जणांची ओळख पटली असून, बाराव्या व्यक्तीच्या नातेवाईकांचा शोध सध्या मालवणी पोलीस घेत आहेत.

इसू भाटिया (६०) असे मयत व्यक्तीचे नाव आहे. या घटनेला जवळपास बारा दिवस उलटूनदेखील त्यांच्या नातेवाईकांचा काहीही थांगपत्ता पोलिसांना लागलेला नाही.

पोलिसांनी दिलेल्या माहितीनुसार, भाटिया हे स्वयंपाकी म्हणून काम करत असून, मालवणीच्या क्रमांक ८ येथील अपघातग्रस्त घरामध्ये तीन महिन्यांपूर्वीच राहण्यास आले होते. मात्र, मुंबईत त्यांचे कोणीही नातेवाईक नसल्याचे शेजाऱ्यांनी सांगितले. त्यानुसार पोलीस मोबाईल कॉल रेकॉर्डवरून त्यांच्या कुटुंबाचा शोध घेण्याचा प्रयत्न करत आहेत. दरम्यान, त्यांचा मृतदेहाचे अद्याप अंत्यसंस्कार झाले नसल्याचे वरिष्ठ अधिकाऱ्यांनी सांगितले.